ZALEN September 5, 2023 : Vawiin khan East Lungdar-a Thangburha Hall-ah East Lungdar Zirna Centenary lawmna hun hman a ni a, 1922-a din Mission School dincham lawmna neih a ni a, an khawchhuak zirtirtu hmasa leh zirlai hlawhtling hmasa te chawimawina hun an hmang a, School Education Minister Lalchhandama Ralte chuan khuallian niin a hmanpui.

East Lungdar Zirna Centenary Organising Committee Secretary, Joseph Lahmangaihzuala hnen atanga thudawn danin, East Lungdar-ah hian 1922 atangin Mission School an nei tan a ni a, Zirtirtu Khuanga hovin zirna hi bul tan a ni. 1924 khan he sikul atang hian a tum khat nan lower primary exam an hmachhawn a, hemi tum hian zirtirtu Khuanga fapa Rodara leh Thangzova s/o Thatvela te chuan an pass a, Thangzova hi East Lungdar chuan an khua atanga lehkhathiam hmasaberah an ngai. 

East Lungdar Zirna Centenary Lawmna hi September 4 zan atanga khan hman tan a ni a, zanin hian a kharna hun an hmang. Vawiin khan Bazar Kawnah Centenary lungphun chu Nuchhuni kum 101 mi chuan a hawng a. East Lungdar atanga zirna bul tan, Zirnaa mi hlawhtling hmasa mi 50 chuang te, zirtirtu lo ni tawh te leh State Awadee to Teacher 2023 Lalengliana Chawnghlut hnenah chawimawina an hlan.

Lalchhandama Ralte chuan East Lungdar Zirna centenary lawma kalkhawmte hmaah thusawiin E.Lungdar-in zirna an dahsang a, centenary hial an lawm chu ropui a tih thu a sawi a, zirna dahsang khua hi engtik lai mahin an te ngai lovang a ti. Kumina State Award to Teachers-ah he khuaa mi Lalengliana Chawnghlut thlan a ni chu phu hle a a hriat thu a sawi.

Minister chuan Thangtharten he ram leh hnam  hmangaihna an theih nan sikulah 'Ro min relsak ang che' tih hnam hla chu zah taka sa țhin turin tih a ni a, naupangten Mizo nunphung an hriat nan Zonun tih chu zirlaibuah hman a ni a, mahni țawng ngeia Science leh Mathematics an zir theih nan Bilingual textbook siam a ni a, naupang te zualte zirlaibuah Zirtirh Bu leh Nambar Bu te siam thar leh a ni a. Zirlaibua milem langte chu hnamdang hmel ni lovin Mizo hmel tihlan a ni a ti bawk.

Minister chuan zirlaite chu Lalpa țihna nen lehkha zir turin a chah a. Zu leh ruihtheih thila inhmang lo tur leh mipat hmeichhiatna laka inthiarfihlim turin a chah bawk.

East Lungdar Zirna Centenary lawmnaah hian Bawngchal pahnih leh Vawk pasarih bakah Ar quintal 1.70, Sangha Kg. 20 leh Artui case 2 bakah Sa ei lo tan chawhmeh an siam bawk.