Bristish singer Ed Sheeran chuan copyright case-ah hnehna a chang ta. Ed Sheeran hi a hla hit 'Thinking Out Loud' chungchangah mi hla copy-ah puh a ni a, a lakah hian copyright case file a ni. 

Marvin Gaye hla 'Let's Get It On' hla copy-ah puh a nih bakah he hla atanga copyright sum pe duh loah a puh ni a, mahse an puhnaah hian thiam a chang ta a ni. 

A tobul
British singer-songwriter hian kum 2014 khan hla hit zet mai 'Thinking Out Loud' hi a tichhuak a, a hun laia hla lar berte zinga mi a ni. A lar viau vang hi nge kum 1973-a tihchhuah Marvin Gaye hla 'Let's Get It On' hla copy-ah puh a ni a, copyright chungchangah hian an buai chho ta. 

'Let's Get It On' co-writer chuan - Sheeran, Warner Music Group leh Sony Music Publishing te chuan copyright atanga an sum hmuh tur ruk sakah a puh a. Hemi chungchangah hian Sheeran chuan thiam loh an chang a nih chuan sum hi an pek tur thu a lo sawi tawh a, mahse thiam lohna engmah an nei lo tih finfiah a ni ta zawk a ni. 

Thubuai chungchangah hian tun hnai khan Manhattan federal court-ah an inlan a, thiam an chan hnu hian Sheeran hi a ding chhuak a, a team te a kuah hial. Kum 34 mi chuan 'Thinking Out Loud' hla hi ama irawm chuak ngei a nih thu a sawi a, an khinna chu a hriat thiam loh thu a sawi bawk. 

Court thutluknaah an lawm tak zet tih a sawi a, midang lakah tihdik loh an neih loh thu leh, chutiang thil chu a tih ngai loh tur thu a sawi bawk. Court-a trail an neih hian Sheeran hian guitar nen 'Thinking Out Loud' hi a sa vel a ni awm e. 

Ama irawm chhuak
Ed Sheeran  hi hla phuah thiam tak a ni a, a zaithiam em em bawk. 'Thinking Out Loud' pawh hi  England-a a chenna ina a thiannu Amy Wadge nena an phuah a nih thu a sawi a, mi hla an copy loh thu chiang takin a sawi. A dan hre mi Ilene Farkas pawhin a thluk leh a hla chungchanga thil inang deuh nia ngaih theih tur lo awm chu rimawiin a ken tel thil a nih thu a sawi ve bawk. 

Copyright buaina
Sheeran hian copyright chungchangah harsatna a tawk thei viau mai a, kum 2017 khan a la hit 'Shape of You' ah harsatna a lo tawk tawh bawk. Hemi tum pawh hian London High Court chuan thiam a lo chan tir tawh bawk a ni. 

Kum 2015 khan Gaye rokhawmtute chuan Robin Thicke leh Pharrell Williams te chu an lo khing tawh bawk a, $mtd 5.3 zet chawi turin an ti. An hla hit 'Blurred Lines' chu Gaye hla 'Got to Give It Up' zul zuia siamah an puh a, mahse thiam an chang zo ta lo a ni.