ZALEN September 18, 2025: Chief Minister Lalduhoma chuan vawiin khan a office-ah Dr. Sunil Shukla, Director General, Entrepreneurship Development Institute of India (EDII) chu a kawm a. Mizoram Entreprenuership Development Institute (MEDI) din dan tur a sawipui.

Chief Minister chuan, rawtna in rawn neih te hi a huam a zauvin department kaihhnawih a ngah hle mai a, inrawnkhawmna zau zawk neih a tul dawn a. Coordination Committee din a, chak taka bawhzui an tum dawn nia, a ti.

Dr. Sunil Shukla hian Mizoram sawrkarin hmunhma a pek theih chuan CSR Fund zawn khawm leh Central Scheme atanga fund awm theite hmangin Entrepreneur & Skill lama hmeichhiate leh zirlai naupangte tan institute tha tak Mizoram Entrepreneurship Development Institute (MEDI) an din thei ang tih a sawi. A tir lam kum 5 chhungin Entrepreneurship te, Skill training te, start-up te, incubation leh mentoring lamte a takin an kalpui ang a. Kum 8 vel chhunga mahnia Campus nei theia din an tum zui dawn a ni, a ti.

EDII hi kum 1983 a din niin Gandhinagar, Gujarat-ah hmunpui neiin, state tam takah Entrepreneurship Development Centre an din tawh a ni.