Mizote zinga inhnialna ti tam pawl leh ngaihdan chi hnih siam tlat thil langsar tak zinga mi chu zu leh halpuah/halmawi hal chungchang hi a ni awm e. Awmkhawmna hmun hrang hrangah heng thil chi hnih hi sawi chhuah anih chuan tha ti pawl leh tha lo ti pawl an awm nghal a, leh lam lehlamin an tanna hi a dik ve ve-ah ngaiin tumah an in hneh lem lo thung. Inhnialna kum khua a ni dawn niin a lang.

Nikum krismas leh kumthar vuakvetah pawh sawrkar leh tlawmngai pawlte chuan halpuah leh halmawi hal lo turin mipuite an ngen a. An ngenna hi a hlawhtling lo kan tih chuan a hlawhtling lo a tih theih ang a, a hlawhtling thawkhat alawm tih pawhin a dik tho niin a lang. Halpuah leh halmawi hi kan society a bet ni lovin sakhaw dang bia te atanga kan lak chhawn niin a lang.

Kum 10 kalta khan halpuah leh halmawi hal lo turin sawrkar leh tlawmngai pawl ten mipuite an ngen a, an ngenna hi mipui ten an zawm thain beisei phak bakin a hlawhtling a ni. Mahse hal lo tura mipui ngentu sawrkar lam chuan a kum lehah hal hun an ruahman leh a, a hnu lamah hal lo turin mipuite ngen thin mahse awmzia a awm tawh lo hle. Nikum hmasa lam khan sawrkar chuan theihtawp chhuahin drone nen lam hal luite an chhui a, case pawh engemaw zat siam a ni. Kumin kumthar lawmna hunah erawh hetianga hma la lo hian ngenna leh inzirtirna lam uar a ni a, hei hian awmzia a nei zawk nia ngaih theihin kum dang zawng aiin hal an tlem bakah hal hun chhung pawh a rei lo zawk.

Khawvel ram dang han thlir ila, halpuah leh halmawi hi awmze nei taka hal thin niin a lang a. Hetih lai hian India ramah erawh chuan awmze nei lem lovin kan hal niin a lang a, Mizote pawh hian kan hal chhan ber chu kumthar lo thleng kan hlimna entirna leh kan sahawk tihrehna atan niin a lang ber. Halpuah leh halmawi kan halna senso hi chhut ni ta se chuan hun rei lote chhunga kan sum sen hi a tam viauin a rinawm.

Halpuah leh halmawi hal hi a haltute tan chuan a nuam hle in a rinawm a, mahse kan hlimna hian midangte tan harsatna thlen em tih erawh ngun taka kan ngaihtuah a tul hle. Kumthar hlimawm tak mai kan thleng hi a lawmawm rualin mi tam tak chuan an huphurh ngawih ngawih thung a, hmun dang daiha awm te an chak thin. Thil puak ri dup dup te hi tar, damlo leh naupang tan chuan tawrh hrehawm tak a ni. Engpawhnise halpuah leh halmawi hal hi chu eng ang pawhin tihrem tum ni mahse thawk leh khata tih rem ngawt theih anih a rinawm loh a. Mahse mipuite kan changkan ang zelin midang tan harsatna a siam leh hriselna atan a pawizia hre chungin kan hal ziaawm chhoh deuh deuh erawh a rinawm thung.