Khua a lum chho tan a, mi tam takin Lui lama chettlat kan ching chho leh tan a, tun hnaiah ringawt pawh tuitla sawi tur an awm leh ta fo mai. KTP Blanket suk hun a ni chho leh tawh a, a huhova luia kan chettlat hian kan fimkhur seng thin lo, hei vang hian chetsualna pawh a thleng fo reng a ni. Lui kal thang ho hi chuan fimkhurna chang te an hriat avangin an chesual vak lo a, chutihrualin a chesual thin ho hi chu lui kal thang lo hi an ni fo thin.

Lui kal hian rau te hi a nei ve a, lui nuam taka kal phei chuan mi tam tak an phur ta thin a, an chetsual phah fo thin. Tin tuiah hian tui thiam tak nih loh chuan infiam te hi tih loh a tha. Tui  thiam tan pawh kan taksa a hrisel leh hrisel loh te thlenga ngaihtuah a tul fo, tuna hma a kan theih kha kan thei tawh lo fo thin a, hetiang avanga nunna chan phah tep te pawh sawi tur an awm fo. Ka tui hleuh laiin ka chawntha a chat a, tlema tlemah ka chesual lo chauh tih te, ka chau thut a, ka inhleuh kai lo tep a ni, tih sawi te pawh kan hre fo thin. Chuvangin tui hi tawng pawng zuam chi a ni lo.

Tin tui chak zawng ka hriat te pawh a tha a, pawng zuam loh hi a him ber. Mahni atuihleuh zir ngawt te pawh hi tih chi a ni lo a, a thiam te thlazar hnuai ngeia zir hi a him tih hriat a tha.

Tui a kan kalin chesual an awm a nih pawhin ngaihtuahna fim hman thiam a tul tak zet a, mi an talbuai va chhan tum ngawt kha a chhantu tan pawh a him lo thei a, an lo talbuai tawh khan mi dang kha che hlei thei lovah lo siamin mi pahnih nunna atan a him lo thei a ni.

A enga pawh chu ni se Lui kan kal hian tui kan chen emaw, sangha kan man emaw pawh ni se, kan himna tur hi kan ngaihtuah fo a tul a, kan nuam tih luatah chesual theih a ni tih hi kan hriat reng a tul a ni.