India ram hi inthlang ram kan ni a, mipui ten kan aiawha roreltu tur kan thlang thin. Chung mipui ten kan aiawh tur kan thlante chuan ram an kaihruai thin a, ti fuh chang leh tih sual chang pawh an nei thin. Chung an hmalakna leh thiltihah chuan an tisual palh emaw an ti fuh lo deuh anih pawhin mawh an phur leh thin.

Tun hnaiah sawrkar dinglai sawiselna leh mawhphurhna la ngam loa puhna ri a ri nasa hle a. Hei hi a tehtu a zirin a dikin a dik lo thei ang. hun kal tawh han thlir kir ila, sawrkar kal tawhte ah khan sawisel bo an awm lo ang. thil tha tih tam tak an nei a, tihsual leh tih fuh chiah loh pawh an nei bawk. Khawvela cheng kan nih miau avangin famkim kan awm lo a, sawisel bo phei chu a awm theih loh.

Kan chief minister ni tawhte kha mi bik, thiamna leh finna-ah pawh mi dangte aia chungnung an ni. Mahse sawisel an kaina thin ber chu an tawngkam hman dan chungchang kha a ni. Politics-ah chuan mahni khingpuite tih chhiat leh hnathawk thei loa siam hi an tum ber a ni thin a, chutih rual chuan dawt politics erawh a lang chhuak leh thin. Chief minister kal tawhte an ni emaw tuna kan chief minister ni mek pawh mipui ten an sawiselna ber chu an tawngka chhuak hi a ni.

Congress sawrkar a ni emaw MNF sawrkar leh tuna sawrkarna chelh mek ZPM ah pawh chief minister te tawngka chhuak hi mipui ten an ngaichang a. Ram hruaitu lu ber, nu leh pa chan chang an nih avangin an tawngkam hi a pawimawh a, uluk taka an sawi tur an ngaihtuah chian fo a pawimawh hle. Hun hmasa lamah te pawh sawrkar mek ten sawrkar hmasate sawiselna leh diriamna lam hawi an chhakchhuak thin kha mipuiin an ei thin lo. Tuna sawrkarna chelh mekte pawh hian sawrkar hmasa thiltih dik lo an sawi ngun lutuk hi a hun tawh lo. Term chanve an chelh chho dawn hnai tawh a, chuvangin midang sawisel zawng ni lovin an hmalak tawhna leh hmachhawpte sawi zawk tawh se a duhawm hle. Mihring chu ti diklo thei, tisual thin kan ni a. Chief minister fapa in loan a lak hi a dik lohna a awmin a lang lo. Chutih rual chuan kan dikna kan sawi dawna midang diklohna sawi tel kher ang chi te hi pumpelh a tha hle mai. Mawhphurhna la ngam, tih dik loh palh an neih pawha an diklohna pawm ngam sawrkar ni se a duhawm hle.