Mizoram Legislative Assembly session neih mekah sawi hlawh tak mai 'The Mizo Marriage and Inheritance of Property (Amendment) Bill, 2026' chu pass a ni a. He dan thar hnuaiah hian thil eng eng emaw tih danglam a awmin khel zui pawh a hlawh hle a, a bikin hnamdang pasal nei leh an vua leh vang ten an khel zual niin a lang.

He Bill pu luttu Law & Judicial Minister chuan dan siamthat tur a sawi zaunaah dan thar chuan Mizo hmeichhia hnamdang pasal nei te chu a huap ve tawh dawn lo tih leh hnamdang pasal nei Mizo hmeichhiate Mizo-na chu a tawp tawh dawn tih a sawi bakah hetiang mite chu an fate chuan an nu te Tribal nihna te an chhawm thei tawh dawn lo tih a sawi a. Hei bakah hian dan siamthat hian Mizo mipa leh hmeichhe inneihna leh Mizo mipa hnamdang nupui neite a huap dawn tih a sawi bawk a. Dan siamthat turah hian nupui pakhat aia tam neih (bigamy) khap a ni a, nupui pasal then ten midang an nei leh dawn a nih chuan an nupui/pasal hmasa te nen an inthen chiang tawh tih nemnghehna tur Divorce Certificate phut a ni tawh dawn a. Hmeichhiain sum an chhuah chuan inneiha a chhawmluh piah lamah an nupaa an thawhchhuah dun atanga zaa 50 pel lovin hmeichhia in a chang ve thei tawh dawn a ni.

Mizoram sawrkarin dan a siamthat tur hi a bikin mipa aiin hmeichhia ten an hlawkpui dawn niin a lang a. Mizo hmeichhia, hnamdang nei chu an faten tribal nihna an chhawm thei lo tur hi chu thil awmsa niin a lang a, a chhan chu mipa thlah kal zel kan nih vang a ni. Nupui pakhat aia tam neih chungchangah hian tun hma deuh chuan mipa zingah nupui pakhat aia tam 'Hmei' nei an awm nual thin a, mahse tun hnuah erawh an vang ta hle. Chutih rualin mipa zingah nupui thlak zut mai pawl engemaw zat an awm a. Heng mite nupui an neih leh dawna an kawppui hmasate nen an inthen ngei a ni tih lantirna tur divorce certificate phut a ni dawn ta hian inthen pawh a tih tlem sawt a rinawm.

Dan siamthat zinga thil thar langsar tak chu hmeichhiain sum a chhuahin chanvo a nei ve tawh tur hi a ni a. Tuna dan hman mekah hi chuan hmeichhia in sum a chhuah chuan a man a pek let a ngai thin a, a chhawm luh bak engmah a chhuahpui lo a ni. Mahse dan tharah chuan a chhawmluh piah lamah an nupaa an thawhchhuah dun atanga zaa 50 pel lo a chang ve thei dawn ta a, hei hi hmeichhe tan chuan thil lawmawm tak a ni ngei ang. Eng ang pawhin dan hi tha mahse a hmangtu hi an pawimawh ber zel a, tuna Mizo dan siamthat tur pawh hi tha viau angin lang mahse famkim tawk lohna pawh a la awm nual niin a lang.