Mizoram chuan zirna in sang tha tak mai Mizoram University a nei a, campus pawh a nei tha in thawktu lam pawh an tha a. Hei mai bakah sum leh pai lamah pawh harsatna lutuk nei lova, building leh hmanruate a neih bawk avangin India rama zirna in tha pawlah a tel phak hial a, a lawmawm hle. 

Sawrkar laipui duhdan angin state sawrkar ten anmahni pual zirna in sang State University din a ngaih tak avangin Mizoram sawrkar pawhin din turin hma a la chho a. Kan ram rorelna in sang State Legislative Assembly-ah bill pu lutin Mizoram State University (MzSU) chu Aizawl-ah din tura ruahmanna kalpui a ni a. Ruahman dan chuan college awm sate hmang tangkaiin clustered university kalphunga din tum a ni a. NEP 2020 duh dan angin State University chu multidisciplinary-a kal a ngaih avangin college eng emaw zat chu sawi khawm (cluster) tum niin, resource neih sa inhmantawm theih chu inhman­tawm tura ruahmanna siam a ni. MzSU dinna tur hmun hi Hihger & Technical Education Minister pawhin tun hnai khan a en a ni.

Mahse hetih lai hian Lunglei-a tlawmngai pawl hrang hrangte chuan Aizawl-ah Mizoram University a awm tawh avangin MzSU chu Lunglei-ah dah nise an ti a. Hemi chungchang bawhzuitu tur Mizoram State University Demand Committee dinin hma an la chho nghal a, kohhran hrang hrang, political party leh tlawmngai pawlte kawmin an hmalakna hi an hrilhfiah a. An ngenna hi ngai pawimawhin sawrkar chuan MzSU chu Lunglei lamah dah a tum leh ta a ni.

Tun hnai mai November ni 20,2025 khan chief minister chuan Mizoram State Universiry hmunpui chu Lunglei-ah dah tum a ni tih sawiin Mizoram State University Bill, Assembly lama lo pass tawh chu a tul anga siamthat (amend) leh mai tum a ni tih a sawi a. Lunglei lam tan chuan thil lawmawm tak a ni dawn a. Chutih rual chuan chief minister thusawi hian inhnialna a chawk chhuak nghal a, tha ti pawl leh tha lo ti pawl awmin politics ball-ah a chang chho mek.

Engpawhnise tun hma atang tawhin zirna hi thil enchhina atan kan hmang fo mai hi a tha lo hle a. A chang leh school sawikhawm kan ti a, a hnu lawkah a hma angin kan kaltir leh a. School calendar pawh a chang leh January atanga December, a chang leh April atanga March tiin kan thlak a. Chutiang zelin school tan hun pawh a changin kan ti hma a, a chang leh kan ti tlai leh thul. Hetianga zirchianna mumal awm lova zirna in kan sawp lutuk hi a tha lo hle. Sawrkar school, zirtirtute pawh training nei tha zawk aia private school kan pan duh zawk tlat te hi kan thil kalpui tawh a fuh loh zia lantirna chiang tak a ni awm e. 

MzSU dinna chungchangah pawh hian Lunglei lam thlirna leh beisei hi anmahni ngaihtuah chuan thil awm tak ni pawhin a lang a. Chutih rual chuan infrastructure leh zirlai chungchangah hian buaina chu a awm ngei dawn a, kan beisei ang zirna in tha hi kan nei thei lo ang tih a hlauhawm hle. MzSU hmunpui dahna chung­changah pawh hian politics thil leh tute emaw nawrna avanga thutlukna kan siam anih chuan a tuartu tur chu Mizoram mipuite hi an ni dawn a, chuvangin ngaihtuahna fim tak nen thu­tlukna hi siam thin nise a duhawm hle.