Mizoram kuthnathawktute thlai chin tam ber chu buh leh sawhthing hi a ni awm e. Buh hi chu kan ni tin chaw a nih avangin hralh chhawn tur kan nei lem lo a, hetih lai hian sawhthing erawh sum chang thlai anih avangin hralh leh a ngai thin a. Chutih rual chuan a hralhna chungchangah erawh kuthnathawktu ten harsatna an tawk thin a, hun kal tawh han thlir kir ila kan sawhthing market hi hnamdang ten min thunun a tih theih awm e.

Tuna Mizorama sawrkarna chelh mek ZPM hian an sawrkar hma atanga an intiamna tihlawhtling chhoin kuthnathawktute sawhthing an lei a, thil lawmawm tak a nih rualin a hralhna chungchangah erawh market kan la hmu fuh lo niin a lang. Tun hnai khan Mizoram sawrkar leh NITI Aayog tangkawp chuan Mizoram sawhthing tharchhuah pung chho mek chungchanga inrawnkhawmna leh sawihona ‘Stakeholders Consultation for Mizoram Ginger Produce’ chu Vigyan Bhawan, New Delhi-ah an buatsaih a. Hetia hmalakna a awm chho ta hi a lawmawmin Mizoram kuthnathawktute tan kawl a êng dawn ta niin a lang.

Kawng lehlama sawi chuan sawhthing ni lo thlai dang, sum chang thlai tha zawk hi kuthnathawktute hian ching thei se a duhawm hle a. A chhan chu sawhthing hian lei tha a mamawh tam a, chu mai bakah lei tha tam tak a luangral thin hi a uihawm hle. Chutih rualin sawhthing lo chu sum chang thlai chin tur tha kan la hre bawk si lo a, kan la chhunzawm zel chu a ngai dawn niin a lang. Tun dinhmunah chuan Mizoram hi India rama sawhthing thar tam state zingah kan awm mek a, kan sawhthing chin pawh a quality a tha viau niin a lang. Sawhthing hi thar tam viau mah ila kan ram awmna hian a zir loh avangin sumdawng lian tan pawh to taka lei a har thin a; mahse, kan khawpui ber Aizawl dai maiah rel a thlen tawh avangin a phurhna man pawh a tlawm thei dawn ta a. Chuvangin, man to zawkin a hralh theih dawn tawh dawn bakah a phurhna kawngah pawh awlsamna a thlen thei dawn a ni. Chutih rual chuan thil hi tih dawn tak tak chuan state pachhia kan ni a, sawrkar laipui kan nghen thiam erawh a ngai hle ang.

Kan hriat angin tun dinhmunah chuan sawrkarin support price kg khat zelah Rs. 50 a pe a, sawrkar hian theihtawp chhuah mahse a hralhna lamah erawh duh anga thiltih a har hle thung. Hetia sawrkarin a lei hi a lawmawm rualin state pachhia Mizoram ang tan chuan lei reng a harsa dawn. Tun ang renga kan kal chuan sawrkar sum hi kumtin vaibelchhe tel sawhthing leina atan a kal ral dawn tihna a ni a; chuvangin, market tha tak hmu thuai thei ila a duhawm hle.