ZALEN September 10, 2023 : Comptroller & Auditor General of India chuan chuan School Education department hnuaia Mizoram Institute of Comprehensive Education (MICE) school sakna tura ruahman Rs. nuai 46 chu department dang tan hman a ni tih a tarlang.

August 23, 2023-a CAG report, Assembly house a pharh takin a tarlan danin Ministry of Development of North Eastern Region (DoNER) chuan September 12, 2006 khan Non Lapsable Central Pool of Resources (NLCPR) hnuaiah MICE school sakna tur hian nuai 46 pek a remti a, he sum hi central leh state in 90:10 a an intumsem tur a ni.

Audit report tar lan danin PWD chuan MICE building hi Zemabawk-a sa tur leh a sakna atan contractor hnenah Rs. nuai 33.37 pek chhuah a remti a. Contractor hi hna a tan atanga thla 11 chhung (April 19, 2008)-ah zo tura tih a ni. School sakna tura ruahman hmun hi leimin awmna hmun a nih avangin sak a remchang lo a, department-in hmun dangah ram an neih si loh avangin hna pawh hi thawh theih a ni ta lo a ni.

Hetih lai hian General Administration Department chuan School Education department te rawn lem lovin New Secretariat Complex chhungah September 2010 khan ram pe in helai hmunah hian MICE school sak hna chu March ni 11,2015 khan thawh tan a ni a. Hna hi May 28, 2016 khan nuai 46 senga thawh zawh a niin hna thawktu PWD chuan May ni 30,2017 khan School Education department kutah an hlan a ni. School Education department hian building sak thar chu room 2 lek a awm avangin an tan luah ngaihna  a awm lova. New Secretariat Complex Management Committee chuan Planning department hnuaia Common Utility Service a hman atan June ni 2,2017 khan a pe ta a ni.

Audit report tarlan danin MICE school hi RM High School leh Govt. Tuikual Primary School II te nen sawikhawmin RM High School campus, Tuikualah March, 2016 khan sawn a ni a. School building pawh NEDP sum vaibelchhe 3 hmangin sak a ni tih a tarlang bawk.

CAG report chuan MICE school hian an awmna tura ruahman school sak zawh (May 2017) ni mah se an luah loh avangin Venghlui ah mimal in an luah chhunzawm zel a. June 2017 atanga March 2022 thleng khan in luah man ah hian nuai 20.14 an seng a. School sakna tur a ruahman nuai 46 leh in luah man atana sen nuai 20.14, a vaiin nuai 66.14 te hi hum theih a ni tih a tarlang bawk.

MICE school hi Central Board of Secondary Education zawm an ni a. Tunah hian class thenkhat chu Venghlui ah hian kalpui a la ni a, thla thar October ah chuan an building thar, Tuikual ah insawn vek an tum a ni.