ZALEN February 14, 2025 : Education Minister Dr Vanlalthlana chuan vawiin khan Indian Institute of Mass Communication (IIMC), Aizawl tlawhin IIMC zirlai te chu an zirchhuah hunah journalist dik leh huaisen tak ni turin a chah. Education Minister chuan kum 3 kum 4 hnuah technology changkang zawk hmanga thuam tum a nih thu a sawi.

Dr Vanlalthlana chuan Kum 2011-a din IIMC chu a bultanna ngaihtuahin, tun dinhmun an thleng thei leh campus tha tak an nei thei ta chu a lawmpui thu a sawi a, India state hrang hrang atanga kalkhawm IIMC Aizawla zirlaite chu Mizorama an awm chhungin a tam thei ang ber Mizoram atanga zir chhuak turin a chah bawk.

I&PR Minister ni bawk chuan Journalism zirlaite chu an zirlai tha taka zo tura chahin, amah ngei pawh journalist a lo nih thin tawh thu a sawi a, thuthar thehdarh chu ram siam that nan a pawimawh tih hriaa huai taka sorkar inrelbawl dana thil dik lo nia a hriat te a lo ziah chhuah ve thin tawh thu a sawi a, zirlaite pawh journalist an nih hunah huaisen tâk leh dik taka thawk turin a chah a ni.

He hunah hian MZU Pro Vice Chancellor Pravakar Rath, IIMC Aizawl Regional Director hmasa ber LR Sailo leh IIMC Aizawl Regional Director, Prof (Dr.) Shashwati Goswami ten thu an sawi bawk a, Doordarshan News Director, Nampibou Marinmai, OSD, IIMC ni bawk chuan lawmthu sawiin hun a khar a ni.