Aizawl: Mizoram sawrkar chuan Mizoram chu ei leh barah kan intodelh thei turah a ngai.

Agriculture Minister C.Lalrinsanga chuan Aizawl North I bialtu MLA Vanlalhlana zawhna ziaka chhangin Mizoramah buh vawi hnih thar theih beisei a ni tih a sawi a. “Kan leilung, WRC leh tlangram enkawl mek te tih changtlun leh develop belhchhah bakah khawl hmanga uar zawka leileh, buhphun, seng leh a herna thlenga hmalakna kalpui tum a niin thalaia phurna leh chona nasa tak hian khawl hmang phei chuan tum hnih lai buh thar theih beisei a ni,” a ti.

Ei leh bara intodelhna atan hian khawl pawh loneitute hnenah pekchhuah a ni tih sawiin, “Tractor leilehna 79, power tiller 150 bakah mini power tiller 125 leh buh phunna khawl 12 chu loneitute hnenah subsidy in pekchhuah a ni tawh a. Hei bakah tractor 47, power tiller 150, mini power tiller 100 leh buh phunna khawl pek tum leh mek a ni a. Farmers te mamawh sprayer, pump set leh brush cutter te subsidy a pekchhuah a ni,” a ti bawk a.

Minister chuan SEDP hmangin district hrang hranga Vaimim chin te sengkhawm mek a niin a hralhna tur pawh ruahman fel a ni tawh niin a sawi bawk.