Tuirial Lemon Processing Unit, Turial a Self Help Group (SHG) te tangkhawmin an din, Mizoram State Rural Rural Livelihoods Mission (MzSRLM) tanpuinaa thar thawh leh chu RD Minister Lalruatkima chuan a hawng a, 'Zobawm Nimbu Tui' tih chu a tlangzarh bawk. Eizawnna ngialnghet zawk neih theihna turin ruahmanna kalpui anih tur thu Minister chuan a sawi.

RD Minister Lalruatkima chuan, “ Sawrkarin Flagship programme SEDP ah mi an thiamna mila ang zela an duh Trade thlangin eizawnna ngialnghet zawk an neih theihna turin ruahmanna kalpui a ni. Kuhva ching duh te, Mistiri leh thiamna dang dang nei te chuan an duhthlanna hmangin SEDP an kalpui thei dawn,” a ti. Hetiang ang hmalakna te leh a dangte pawh changtlung zawka kalpui a nih theihna atan Sawrkarin theihtawp a chhuah mek thu a sawi a. Mi harsa leh rethei te tan sawrkar chu a ding mekin, a la ding zel dawn tiin eng ang pawhin Sawrkarin min puih huam mahse, mi taima tan lo chuan hlawhtlinna tluantling hi a awm thei lo a ni tih kan hriat thar leh a tulin ka hria, a ti.

Minister chuan MzSRLM hmalakna hrang hrang ten thingtlang hmun hla tak tak thlengin henga cheng mipuite tam tak ten lei rem an raha eizawnna ngelnghet an neih theih nan eizawnna kawng an dap puiin kawng an kawhhmuh thu a sawi a. Sawrkar chuan, SHG thanlen zel nan leh hma an sawn zel theih nan theihtawp a chhuah mek zel tiin Kum 2019 January atanga 2022 January chhung khan Community Investment Fund ringawt pawh cheng nuai 7825.09 VO (Village Organisation) ah pek a nih thu a tarlang a ni.