ZALEN, Mar. 27, 2025: Electric Veng Branch YMA, Aizawl chuan nikuma hlawhtling taka an lo hman tawh, ‘YMA Chhang Zân’ chu Ningani zan khan an hmang leh a, naupangte bakah Vakulchang Cultural Club-in hnam lâm an entir.

An YMA Hall-ah hun an hmanah hian naupangten Tlanglâm, Sawlakia, Châi, Sarlamkai leh Cheraw an entir a. An venga Vakulchang Cultural Club hi an inlan bawk a ni.

He zan hmang tur hian YMA Chhang Chhang hruaitute chuan March 3 atang tawh khan ni tin Thawhtanni atanga Zirtawpni thleng chawhma dar 10:00 atanga chawhnu dar 02:00 thleng hnam hla leh lâm an zirpui thin.

Hnam hla leh lam an zirtir bakah hian Pathian thu te, nun dan mawi te, aia upa zah chungchang te bakah tleirawl kum riat leh kum 14-te tan hriselna (hmeichhiatna) kawnga an inenkawl thiam theihn turte an zirtir a. Sports an neihpui bawk.

Heng bakah hian Social Welfare Department District Child Protection sawmin naupangte dikna leh chanvo chungchang an zirtir bawk.

YMA Chhang Zân hi Electric Veng YMA hruaitu, veng chhung nu leh pa leh naupangten an hlawkpui hle a, chhunzawm zel tlak niin an hria.

Electric Veng YMA buatsaiha hun hman hi Central YMA atangin Roneihthanga, Treasurer leh HF. Lalrinpuia, Kumpuan Sub-Committee Secretary ten an hmanpui bawk.