Thla 16 chhung zet a chawlh hnuah Ellen DeGeneres chu TV-ah a kir leh ta. A kir thu hi Discovery Channel special 'Saving the Gorillas: Ellen's Next Adventure' kaltlangin a puang a, lawm fe fe an tam khawp ang le. 

Kum 65 mi lai ni ve tawh Ellen Degeneres hian 'The Ellen DeGeneres Show' a larpui vet vet hle a, khawvel hmeichhe thil tithei leh huhang ngah ber ber zingah pawh a tel phak hial. Mahse rin loh takin May 2022 khan season 19 zet an lo kalpui tawh 'The Ellen DeGeneres Show' chu a titawp lai lawk a, a reh zui deuh vang vang. 

Tunah chuan project thar 'Saving the Gorillas: Ellen's Next Adventure' a rawn thar thawh leh tawh a, September 23 hian Discovery Channel-ah tihchhuah tan a ni ang. Hemi atan hian Rwanda-ah a zin vang vang a, gorilla te venhim leh humhalh dan tur a zir chiang a ni.