ZALEN June 27, 2025 : Mizoram Journalist pahnih HC Vanlalruata leh Isaac Zoramsanga te chuan mellung hriat reng tawh tur an phun a, documentary-a international Emmy Award ngaihhlut hlawh dawng zingah an tel.

Award an dawnna documentary hi short-form documentary huanga mi niin 'Myanmar's Civil War' tih a ni a, Outstanding Continuing News Coverage – Short Form at the 46th Annual News & Documentary Emmy Awards categories huangah an dawng a, National Academy of Television Arts & Sciences (NATAS), USA te chuan nimin khan New York-ah an hlan.

Award an dawn chungchangah hian HC Vanlalruata chuan an lawm hle tih a sawi a, March ni 17, 2025 khan nomination-a telh an ni tih an hriat thu a sawi a, dawn pawh an inring lem lo a ti a, an dawn tur thu an rawn hrilh kha chuan an lawm ve hle a ti a, team zinga an tel pawh chawimawina ropui tak a tling a ti bawk. 

Tun tuma Myanmar an han luh hian an lut thuk hle niin HC Ruata chuan a sawi a, Bomb hmanga sipaiin an tihchhiat Tlanglo khua an han thleng tih ZALEN a hrilh.

HC Vanlalaruata leh Isaac Zoramsanga te hi BBC project tan hian field producer an ni a, Chin State, Myanmar-ah kalin ni 10 lai an an chamchilh a. An hnathawh avanga hian an team hian Myanmar tualchhung buaina a thil thleng hmuh tur vang tak chu khawvel hmuh theihin an pholang a ni. 

Minute 7 vel leka thui documentary-ah hian tualchhung mi lungawilo ten Myanmar sipai rawng tak te hmun hrang hranga atanga an nawrchhuah dan tarlanna a ni a, sipai rawng tak tak ten mi an tihduhdah dan te, khua an suasam dan te leh mi an that dan te tarlan a ni a, rawltharte sipai zawm lo tura hma an lak dan te tarlan a ni bawk.