Aizawl: Mizoram Excise & Narcotics Department chuan kum kalta April ni 1,2019 atanga March ni 31,2020 inkar chhung khan ruihhlo kaihhnawih ah lirthei 224 an man.

Excise & Narcotics Department in ruihhlo chi hrang hrang phurhna atana hman lirthei an man te hi two wheeler 90, three wheeler 12, LMV 115 leh HMV 7 te an ni. Hemi hun chhung veka END ten zu chi hrang hrang an man khawm atanga chhiah an hmuh leh thilsual titu hrang hrang an hremna atanga an chawitir belhkhawm chu Rs. 272,73,718.00 a tling bawk.

END te hian kum kalta chhung khan Mizo siam rakzu litre 1,02,676.145 an man a, zu bilh lai tin 1,48,833.1/2, zu siamna atana hman dawidim/yeast kg.553.170 an man a. Heng bakah hian heroin Kg. 15.826 , opium Kg. 2.177, ganja Kg. 332.351, methamphetamine Kg.147.388, nitrazepam tablet 555, diazepam tablet 52, alprazolam tablet 6,204 leh pseudoephedrine kg. 90.692 an man bawk.

Kum kalta chhung vek khan ND&PS Act hnuaiah mi 1150 manin thubuai 840 ziah luh a ni a, Mizoram Liquor (Prohibition) Act, 2019 dan hnuaiah mi 1729 manin thubuai 2446 ziahluh a ni a. Mizoram Liquor (Prohibition and Control) Act, 2014 hnuaiah mi 354 manin thubuai 438 a awm bakah Mizoram Excise Act, 1973 hnuaiah mi 111 manin thubuai 113 ziahluh a ni bawk a ni.