Aizawl February 15, 2024 : Vawiin khan Central YMA Committee Room-ah Excise & Narcotics Minister Lalnghinglova Hmar hovin Central YMA hruaitute leh Excise Department hotute an inkawm a. CYMA President Lalhmachhuana chuan inkawmhona hi a kaihhruai.

Lalnghinglova Hmar chuan Central YMA in ruihhlo do kawnga theihtawp chhuaha an hnathawhte a hriatpui thu leh ropui a tih thu a sawi a. Excise Department nen theihtawpa tanho leh thawhho a tul thu a sawi. Ruihhlo dona kawngah thurawn inpe tawn tur leh hmalak dan turah inpuitawn zel turin a chah bawk. Minister hian ruihhlo dona atan Central YMA ah Rs.50,000/- a hlan nghal bawk.

CYMA President Lalhmachhuana chuan Minister in ruihhlo dona kawnga YMA te hnathawh hriatpuia Central YMA Office a rawn tlawh chu lawmawm a tih thu a sawi a. Theihtawpa tan lak zel an tum thu leh Excise Dept te nen pawha inpawh tak leh pheikhai rual taka thawhdun zel a duh thu a sawi. Central YMA in ruihhlo dona kawnga hma a lakna thenkhat te ngaihthlak a ni bawk.

Excise & Narcotics Department Commissioner Z. Lalhmangaiha’n Excise Department hmalakna thenkhat leh YMA te nena thawhhona te a sawi bawk.

Inkawmhonaah hian ruihhlo do kawnga hmalakna zel turah thawhho dan tur te sawiho a ni a, hetiangin :

1. Ruihhlo do kawngah Excise & Narcotics Department-te leh Central YMA ten pheikhai rual tak leh inpawh tak a thawhho nise.

2. Ruihhlo do kawngah a theih ang angin inpuih tawn zel nise.