Boruak ti chhe lo leh hman nawn theih chakna thahrui energy lama hmala tura din Zoram Energy Development Agency (ZEDA) chuan Ministry of New and Renewable Energy in sum a tum sak hmangin tunkar khan 1st Renewable Energy Exhibition 2016 a buatsaih a, kar tluan awh a ni. Exhibition ah hian Renewable energy siam chhuah a nih dan entir a ni a, ZEDA hmalakna pholan a nih bakah electric bungraw hrang hrang a man chanve dawna tlawmin mipui tan phochhuah a ni bawk. Tunlaia thiamna in a hrin chhuah zingah clean energy hi mi thiamte chuan khawvel hma hun tih an hria a. Gas leh petrol te hian boruak an tichhia a, sik leh sa nasa takin a tidanglam a, kan chenna lei tichhetu a ni bawk a. Tangkaina a neih ang bawkin pawi a khawih lawi si a ni. Chumi piah lamah gas leh tuialhthei te chu engtik niah emaw chuan kan la siak kang dawn a, chumi hunah chuan chakna thahrui energy boruak tichhe lo leh man tlawm zawk neih hman a nih loh chuan khawvel pum hi a ding thuap dawn tih a lang tan tawh a ni. Hemi hi hriain ram changkangte chu renewable energy siam chhuahah an intlansiak nasa tawh a, thenkhat chuan an hmang tan tawh a, lirtheiah enchhin a ni nasa bawk a. Ni zung hmang leh battery hmangin lirthei siamchhuah ni nual hlawm a, tui (water) hmang lirthei te hial enchhin a ni zel a, zawi muangin energy atana kan rinchhan hi a danglam zel dawn a. Bawlhhlawh, thli, Ni zung leh a dangte atanga energy chhawr nahawm, boruak tibawlhhlawh lo hi kan rinrawl ber tur a nih avangin tun atanga inpuahchah a hun tawh hle mai. Heng chakna thahrui energy thianghlim pe chhuak thei te hi tunah hrih chuan a khawl man te a to deuh a, mahse thui zawk thlir chuan enkawl ngai tehchiam a nih loh avangin a tlawm zawka ngaih a ni tho tho. Chumi piah lamah khuanu siamsa te an ni a, senso a tlem zawk a, a thianghlim a, boruak a ti chhe ve lo a, ram rethei tan phei chuan a uma um chi niin a lang. Kan ram, power siam chhuah nei mumal lo angah hi chuan Ni zung chakna a tangkai thei hle a, hmun thlan bikah te en chhin mek niin streetlight tih en nan chhun lamah solar hmangin power khawl a ni a, zan lamah chhit a ni thin a ni. Thli chakna hi buaipui vak ngai loa thahrui pe thei an ni bawk a, ram thenkhatah chuan hmun khatah ban za tel teh meuh an tlar a, chumi atang chuan power lian tham pek chhuah thin a ni bawk. Bawlhhlawh atanga energy siamchhuah hi zirbing deuh a la ngaiin a hriat a. Kan ram angah chuan mimal thahnem ngaihnaa tualchher khawl siama chakna thahrui hmang te pawh an awm tawh a, kalkawng a la thui hle a, mahse thu lawmawm ah pawm zel phawt ila. Tun dinhmunah chuan gas leh petrol te hi thlak rup rup theih pawh a la ni lo nachungin thahrui boruak tichhe ve lo te nena tan kawptirin sum leh tha tam tak kan hum theih a rinawm tlat a ni. Power renchemah tuna tih theih mai a awm a, LED light kan hmang ve tan a, current a heh lova, a en dan pawh a hahdam zawk a ni. LED hi Mizorama chhung tinte hian hmang ta ila, tuna kan mamawh hmun 1/3 laiin a tlahniam thei niin kan mi thiamten an sawi lehnghal a, a tirah senso a tam hret a nih pawhin thil thui zawk thlir thiam a pawimawh hle. Mahni chenna in theuh hi ‘self sufficient’ turin hmalak intihhmuh a hun ta viau e, mi thenkhat chuan Ni zung hmangin eirawng an bawl thei hial tawh a. Ni zung, thli leh a dangte pawh nise tan kawptir an nih chuan sum tam tak kan hum theiin a lang a ni. Hetiang anga ram tana pawimawh a nih lai hian hmalakna erawh tun aia beih nasat a tul tih a lang a. Mipui rilrua nghet taka tuh a nih theih nan tan lak thar a tul khawp mai. Chutih rualin mumal zawka hmalak dawn a nih chuan Policy felfai tak duan a tul bawk si a. Policy tha tak neih vat hi tuna ramin a mamawh hmasak niin a lang a ni.