ZALEN March 20, 2025 : Power & Electricity Department chuan kum thar, 2025-2026 chhungin power hman man tihsan tumna a awm lo chungin Rs. vaibelchhe 554.92 hmuh an beisei.

Mizoram Electricity Regulatory Commission (MZERC) huaihawta public hearing neihah he thu hi sawiin Power & Electricity Department hotute chuan mipui atangin êng chhit manah hian Rs. vaibelchhe 448.17 leh state pawn a power hralhna man atangin Rs. vaibelchhe 106.75, a vaiin Rs. vaibelchhe 554.92 hmuh an beisei tih an sawi a.

Hei bakah hian power hman man tihsan a nih dawn loh avangin sum indaih lohna phuhrukkna tur hi sawrkar atangin Rs. vaibelchhe 199.77 hmuh an beisei tih an sawi bawk a; mahse, sum ngai zat tur hi chu MZERC-in thu tawp a siam ang.

Nikum lamah sawrkar atanga sum hmuh beisei hi Rs. vaibelchhe 211 a nih laiin MZERC chuan Rs. vaibelchhe 197 turin a bithliah a ni.

P&E Department chhut danin kum tharah hian Mizoram chhungah power hi million unit 574.28 hmang tur leh state pawna hralh tur hi million unit 180.90 ni turin an chhut a. Kum thara power mipui leh state pawna mi zawng zawng hi million unit 755.18 ni tura chhut chhin a ni.

Nikumah khan êng chhit man hi chawhrualin mipuiten unit khat Rs. 8 zel anga lei an ni a, kuminah pawh tihsan hi rawt a nih loh avangin nikum rate ang hian mipuiah hralh a nih a rinawm.

Eng chhit man chungchanga thuneitu sang MERC Chairman Er. Benjamin L. Tlumtea chuan P&E department rawtna hi an zirchian tur thu sawiin êng chhit man thar hi April, 2025 atanga hman tan tur a nih avangin March thla chhung ngeia tihfel a ngai niin ZALEN a hrilh.

Eng chhit man hi ZPM sawrkarin tihpun loh tur a tih avangin sawrkarna an chan hnuah tihsan a la ni lo a ni.

Power & Electricity Department hotute tar lan danin an department-ah thawktu mi 2,523 an awm mek tih sawiin thawktu hi nikum aiin mi 99 in an tlem zawk niin an sawi bawk.

MERC hi ni July 23, 2024-a din a ni a, tun hi din a nih hnua êng hman man an ngaihtuhana hmasa ber a ni a. A hmain Manipur nen inkawpin JERC in a lo bithliah thin a ni.