ZALEN, Nov. 15, 2024: Manipur-a Zo hnahthlak leh Meitei inkara boruak tang tak a awm mek laia tlawhtu, MNF Senior Vice President Dr. R.Lalthangliana leh a team chuan Zirtawpni khan Zofate kiangah hun an hmang a. An zinga tel, Lalrintluanga Sailo, MLA chuan ‘eng pawh tawrh leh inbeih huama an kal’ thu a sawi.

Dr. Thangtea leh a thuihhruaite hian Rengkai, Churachanpur-a Hmar Inpui tlawhin tun hnaia boruak a tan zual leh chhan bulpui ber, CRPF-ten Zo hnahthlak mi 10 an kah hlum tak leh Zosangkim Hmar ralna an hlan.

MNF sr. vice president chuan hnam tana pasalthate martarna chuan hmun tina awm Zofate phuar khawm se a duh thu a sawi a, “Inthen thei kan ni lo tih chu kan hriat reng a tul a, ram chuan ri neiin hnam chuan ri a nei ve lo a, thinlung chhungrila khawvel hmun tina Zofa unaute inpumkhatna nghet tak nei sauh sauh turin ka sawm che u a ni,” a ti.

Dr. Thangte hian he thihna hian an rilru a vit a, an kalsan tak an chhungte Pathianin awmpuia thlamuan tura a duh thu a sawi bawk.

MLA Lalrintluanga Sailo pawhin, “Vawiin hian he lai boruak hre hmasa lovin eng pawh tawrh leh inbeih huamin kan senior vice president hovin kan lo kal tawp mai a. Lo thlaphang lo ang che u,” tiin a thlamuan a. Manipur Chief Minister N.Biren Singh chu bang tura ngenin a duh lo a nih chuan Greater Mizoram an phut leh ang a, Zofate chenna chu Mizorama rin luh leh an duh tih hre turin a chah.

MNF hruaitute hian chawhnuah S.Zezaw khaw daia Ex-Mizo National Army Sub-Headquarters, Manipur leh S.Zezaw MNF buatsaiha Mizo Hnam Pa, MNF Founder President Laldenga lung phun an hmanpui a. He hunah hian Dr. Thangtea chuan, “Pu Denga lungphun hian Zofate inpumkhatna tha zawk a hrin chhuah ngei ka beisei,” a ti.

Dr. Thangtea leh a thuihhruaite hi Rev. Rose Infimate, President Hmar Inpui General Headquarters leh Hmar Students' Association Gen. Hqrs., Rengkai, Churachanpur-ten an lo dawngsawng a. Lung phunna hi C.Zama President, Ex-MNF Gen. Hqrs, Aizawl leh a hoten an hmanpui bakah he lai bial, Singal MLA Chinlungthang leh pawl hrang hrangin an hmanpui bawk.