Aizawl December 29, 2022: I&PR Minister Lalruatkima chuan, "Zirna lama hma kan sawn theihna tur leh ram leh hnam tana nghet taka ding ṭhin zirlai pawl Zoramin kan nei hi a lawmawm tak zet a ni," a ti a. "Engkima hmasawnna kawng bul thut chu Zirna hi a ni a. Vawiina lo kal khawm te hian zirna i uarin i ngai pawimawh zel ang u," a ti bawk.

North Serzawl MSU Sub Hqrs. Silver Jubilee lawmna a hmanpui naah khuallian Lalruatkima chuan, zirna ngai pawimawhtu Lalchhandama Ralte bialtu MLA tha tak an nei chu lawmawm a tih thu a sawi. Ruatkima chuan, "A sek apiang, a chak apiang dinchanna khawvelah kan cheng thin a. Hun a kal zel a, 'a ruh no no chhuakah' tihna khawvelah kan cheng chho ta a. Tunlai khawvelah chuan lehkha thiam apiangte dinchanna khawvelah kan cheng ta mek a ni. Eng hna pawh thawk dawn ila, a mawi tawk lehkha thiam a pawimawh a, kut hna kan thawk dawn a nih pawhin lehkhathiam a pawimawh tho a ni," a ti.

I&PR Minister chuan, "Kawng engkimah taimakna leh beih tang tangna a pawimawh a. A peih leh a taima tan chuan thawh tur a tam em em a ni. Chuvangin, kawng hrang hranga dingchhuak tur chuan tumruhna leh taimakna kan neih a ngai a ni. Central service-ah Mizo tling kan tlem ta te hi a veiawm a, zirlaite'n tan kan lak a ngai nasa hle a ni," a ti bawk.

Minister chuan, "Mizote kan la tlem em em a, fa nei tam turin kan inzirtir a ngai a ni. A hnam anga kan dinchhuahna tur te, hma kan sawn zelna tur atan kan tam a ngai a ni. Mizote i inthlahpung chak ang u," a ti bawk.