Aizawl August 11, 2022: Vawiin khan Lal Thanhawla Auditorium-ah Mizoram Pradesh Mahila Congress-te chuan Political Training cum Intuaitharna hun an hmang a, hun hman pui tu MPCC President Lalsawta chuan, "Environment tichhe lo zawngin hmasawnna hi kalpui angai a, mi rinawm leh taimate dinchhuahna tur ram kan siam a tul a ni"," a ti.

Lalsawta chuan, "Khawvel hnam tin hian ram leh mipui kan nei vek a, he thil lian tak tak pahnih hi ram hruaitute'n an hman leh enkawl dan a zirin ram chu a nuamin a hrehawm thei a ni. Chung thil pahnih te hmang tangkaia ram rorelna tha neia mi taima leh rinawmte dinchhuahna siam tur chuan ram mipui rilru siam tha thei zawng leh an ngaihsan zawng kan thlak hi a pawimawh hmasa em em a ni. Tin, Environment tichhe lo zawng a hmasawnna hi kan kalpui a tul a ni," a ti.

MPCC President chuan, "Mipui thawhkhawm sawrkar sum hi mipuite dinchhuahna tur a hmanraw pawimawh ber pakhat a ni a, ram roreltuten an thuneihna leh mipui sum chu mahni hausak nana hmang lo va,  an rawngbawl sak mipuite'n eizawnna ngelnghet, ram changkang, nuam leh him siam nan an hman a ngai. Congress sawrkar-ah khan mipui leh kohhrante duh loh zawng takin thil kan ti niin ka hria a, a pawi ka tiin kan tihsualah ngaihdam kan dil a. kan ramin Congress a mamawh tih hriain rilru thar neiin kan insiamtha chho mek a ni. Mizoram mipuite pawhin kan hun liam tawh a kan tlin lohna te min theihnghilh sak a, sawrkar tha siam kan tum hi theihtawpa min thlawp turin kan ngen tak meuh meuh che u a ni," a ti bawk.

Political Training cum Intuaitharna hun hmangin, MPCC President Lalsawta leh Professor Zokaitluangi, MZU-ten thu an sawi a, intuaitharna inkhawm hi MPMCC President Vanlalawmpuii'n a kaihruai a, Lalremsiami MPMCC Vice President in tawngtainaiin bul a tan a ni.