Aizawl: Retailer ten dik taka buhfai an sem theihna tura Mizoram sawrkarin khawl thar Electronic Point of Sale (ePOS) September thla chhunga Aizawl retailer ah dah a tum chu supplier lamin khawl an tih thlen loh avangin hman theih a ni hrih lo.

Zalen palaiin FCS&CA department thawktute hnen atanga thu a dawn danin department lam chu inpeih vek mahse khawl supply tu lamin harsatna an tawh avangin an tum angin thil tih chak a harsa tih an sawi a, khawl hi a lo thlen veleh Aizawl khawpui chhunga retailer 148 te chu training pe in khawl thar hi hman nghal tum a ni tih an sawi.

Retailer te dawra ration khulhna tura khawl bun (FPS Automation) hi hmang vek turin Ministry of Consumer Affairs, Food & Public Distribution chu state sawrkar te a hriattir a. Aizawl khawpui ah FPS (Retailer) 149 awmin ePOS khawl hi Zonuam Retailer I ah hman a ni tawh a, ruahman dan chuan September thla chhung hian Aizawl khawpui chhunga Ration dawr 149 ah bun (install) zawh hman tum a ni.

FPS Automation-ah hian buhfai hralh nan ePOS machine hman ani dawn a, chu khawlah chuan beneficiary te kutzungthla (finger print) hmangin an quota tur pek an nih dawn avangin leh an fingerprint chu Aadhaar ami nen en mil (authenticate) vek anih dawn avangin, ration card neitu chhungkua ami aadhaar number thlunzawm lo chuan ration an la thei tawh dawnlo a, card in hawh sak mai mai pawh a theih dawn loh a ni. Mipui ten an ration lak dan te zawng zawng pawh internet kaltlangin server-ah a in chhinchhiah zel dawn avangin thla tawpah hralh bang a awm anih pawhin a hriat theih vek dawn a. Retailer tan a hralh bang chu a thla leh quota atan rin nghal zel tur a ni dawn a ni.