India-a parliament building thar chu tun kar tawp hian hawn a ni dawn a, eptu party 19 zet chuan hawnna inkhawmah hian an tel dawn loh thu an puang tawh.

Building thar hi Pathianni hian Prime Minister Narendra Modi-a’n a hawng dawn a ni.

Eptu hruaitute chuan danpui hnuaia thuneitu sang ber, president-in building hi a hawng ngei tur a ni an ti.

Rorel lai, BJP hruaitute erawh chuan eptute hian ‘political games an khel mai mai a ni’ tih an sawi ve thung.

Nilaini khan epty party lian ber, Congress telin party 19 chuan thuchhuah intawm an siam a, ‘inlungruala thutlukna siamin’ hawnna inkhawmah hi an boycott tih an tar lang.

Building  thar hawn chu ‘hun hriat rengtlak’ an tih rualin Modi-a’n ‘ama hawn tura thutlukna a siam’ chu India-a mipui rorelna ‘zah lohna leh hmuhsitna’ tiin an sawi.

Thuchhuahah hian eptu MP-te chu thil pawimawh tak tak sawiho a nih laiin ho tete hmangin ‘disqualify, suspend leh ngawihtir’ an ni thin tih an tar lang tel bawk.

“Parliament atang hian mipui rorelna thinlung chu paih chhuahin a awm a, building thar hian hlutna pawh a neiin kan hre lo,” an ti.

India Home Minister Amit Shah chuan hawnna inkhawma tel tur hian political party zawng zawng sawm an ni tih a sawi a, eptute chu he thil hi politics khelh nana hmang lo turin a ngen bawk.

“Sorkarin tel vek turin a ngen a. Tute pawhin anmahni ngaihdanin thil an ti ang,” tiin Nilainia thuthar lakhawmtute a kawmnaah a sawi.

Rorel lai, BJP leh eptu party tam zawk hi an inkar a tha lo hle a, parliament session-ah a lang chhuak nasa zual thin a. Tun hnai lawkah Congress hruaitu, Rahul Gandhi-a chu mi tihhmingchhiat thubuaia lung in tang tura hrem a nih avangin eptute chuan lungawi lohna leh duh lohna an lantir nasa hle nghe nghe a ni.

BJP kaihhruai National Democratic Alliance (NDA) sorkar chuan eptute thuchhuah intawm siam chu an sawisel a, ‘kan mipui rorelna leh anmahni thlangtute laka huaikawm bawlna’ tiin an sawi a. Eptute chu ‘an tana politics-a hamthatna tur chauh ngaihtuah lova ram ngaihtuah zawk turin’ an ti bawk.

Eptu hruaitute hian building thar hawn ni tur pawh an sawiselin an duh lo bawk a. A hawn ni tura ruahman ni Hindutva ideologue VD Savarkar-a piancham a ni chiah a ni.

Hetih lai hian eptu party zawng zawng an inlungrual bik lo va. Regional party thenkhat - Biju Janata Dal leh YSR Congress Party te chuan inkhawma an tel tur thu hi an sawi chiang tawh.

Parliament building thar hi sorkarin Delhi-a Central Vista power corridor a siam tur peng pakhat a ni a, ruahmanna tihchhuah a nih rualin sawi neuh neuh a tam nghal hle.

Eptu hruaitu, environmentalist leh vantlang pawl tam takin project kalpui hi a man a tam avang te, sorkarin mi dang leh vantlang rawn miah lova thil a kalpui nia an sawite a awm avangin an duh lo va. Sorkarin a awm sa chei tha mai lova building thar a sak chhan pawh an zawhna tam pawl a ni.

Sorkar erawh chuan parliament building thar sak hi a tul hle nia sawiin a hlui hi chu ‘retheihna lantirtu leh a hmangtuten an indaih lo’ niin a sawi.

Building thar hi HCP Design, Planning & Management-in an duan niin Tata Projects-in a sak hna an tum thung a. Hman lai mek laiin thu thei zat a tam zawk dawn a, Rs. tluklehdingawn 9.7 senga sak a ni.

Kum 2020-a sak tanna tur lung phum a nih khan Congress chuan an lo boycott tawh a, lo neituten lo neihna dan thar pathum sawi hlawh tak duh lohna an lantir vung vanglaia hetiang tih chu a hun lo nia sawiin an lo tel duh tawh lo a ni.