June 15, 2023; Mak ang reng takin, tun hnaite chho-ah eptu party ten sawrkar an beihna thuchhuah hmuh leh hriat tur an nei mang lo. Rorellai MNF erawhin eptu lamte beihna thuchhuah/press conference an nei zauh zauh thung.

Aizawl Press Club kaltlang a party lian zual ten thuchhuah an siam atanga a lan danin, tun June thla chanve chhung hian MNF party chuan thuchhuah (press conference telin) vawi 22 zet an nei a, hetihlai hian congress party (MPCC) chuan vawi 7 chauh an nei.

ZPM lam pawh an chuti lua bik chuang lo a, tun thla chanve chhung a thuchhuah an neih 12 ah sawrkar beihna lam a awm mang lo a, political session an neih te, an MLA leh corporator thenkhatte chet velna te, meeting an neih chungchangte a ni tlangpui.

Inringtawk ru tak a phur ru riau BJP lam pawhin, press conference an neih chhiar telin thuchhuah 5 an nei bawk. 

Party te thuchhuah hrang hrang thlirin, tunhnai chho-ah a bikin eptu party lam te anmahni chhung a chinfel ngaite an inchingfel ni-ah a ngaih theih a, sawrkar beih lam an hawi thei meuh rih lo em ni aw a tih theih. Inthlan kum a nih miau avangin politics boruak a 'hot' chho dawn tih erawh rin tur.

Hetih mek lai hian social media lamah erawh 'chumi chu kan lawmlut' 'chumi te chuan MNF/ZPM/Congress an chhuahsan' tih ziak hmuh tur a tam em em reng! An thlalak nen lam !