ZALEN October 23, 2024 : Sinlung Hills Council General Election 2024 Campaign kal mekah Vawiin khan School Education Minister Dr. Vanlalthlana chuan Sunhluchhip, Sailutar leh Ratu khuaah te campaign-in hun a hmang, eptu party-te inenfiah ve sela an duh tih a sawi.

Dr. Vanlalthlana chuan, "Sawrkarna kan chan hnuah sawrkar hnathawk hlawh kan theih chen chenah a hun takah kan pe chho zel a, chutih laiin Central Scheme hnuaia hnathawk hlawhte hi kan thuneihna piah lam a nih avangin duh huna pek theih loh chang a awm lo thei lo hi a changtu Minister ka nihna ang pawhin pawi ka ti tak zet ni. Tin, mid-day meal chungchangah pawh sawrkarin sum inpek dan kalphung a tihdanglam vangin harsatna kan tawk a, keini pawhin hrehawm kan ti a, hei pawh hi reiloteah a kal dik leh thuai dawn a ni."

"Eptu party ten 'ZPM chuan kan ti ang an tih an ti lo va, kan ti lo vang an tih a piang an ti' tiin mipui rilru hruaikawi an tum thin a; nimahsela, kan ti ang kan tihte hi kan ti chho mek a, vawi lehkhata engkim tih nghal theih a ni lo, hunrei tak sawrkarna lo chang tawh ten an tih theih loh hi kan ti chho mek a ni. Kan ti lo vang kan tihte pawh kan ti lo khawp mai, eirukna lakah pawh fihlim zel hi kan tum tlat a ni. Chuvangin eptu party-te hi inenfiah ve sela kan duh a, mipui rilru hruaikawi tuma polictics an khelhna kawngah hian thu dik leh belhchian dawl hmang thin sela kan duh hle a ni," a ti.

Minister chuan, "ZPM te hian corruption laka fihlim kan intiama, vawiin thlengin Pathian khawngaihna zarah eirukna laka hmingchhia kan awm lo a, hei hi thil lawmawm tak leh kan thutiama kan rinawmna lantirna a ni. Tin Aikal lak titawp turin hma kan la a, a harsa khawp mai; mite huat pawh kan hlawh ngeiin ka ring, nimahsela kan ram tana tha turah chuan nghet takin kan ding zel dawna mipuite pawhin min hriatthiampui kan beisei a ni."

Mathlana chuan, "Tuialhthei man tihsan chungchangah pawh mipuiin sawrkar ruahmanna hi an hrethiamin an pawm hlein kan hria a, a chhan chu heng chhiah kan lakte hi mipuite tana hman tur a ni a, Zirna, hriselna, hmeichhiahte tan leh kawng siamthatna atana hman tur a ni a, mipuite hnenah a vaiin heng chhiahte hi a let leh vek dawn a ni. Heti chunga thenkhatin nawrh an la huaihawt duh hi thil ngaihtuah chian loh vang mai niin a lang," a ti bawk.