ZALEN May 5, 2025 : ZPM General Headquarter chuan vawiin khan Party Office ah chhung inkhawm an hmang a,thusawitu PAC Member TBC Lalvenchhunga chuan, Kalphung thar mipui sawrkarin hun reilote chhungin thil tha tam tak a tih tawh thu a sawi a, kum kalta chhunga nuai 100 tel an hum thu te, ATL Road leh MUHCS chungchang te Electric leh Tui bill chungchang te a sawi.

ZPM PAC Member TBC Lalvenchhunga chuan, “ZPM hian sawrkarna kan chan hnuah ram tan thil tha tam tak kan ti tawha, chutih rualin kan thiltha tihte mipui hriata puanzar kawngah mahni in fak kan hreh hle niin a lang a, eptu Party te sawichhiatna kan sepui ruah tawrh leh ngawt ngawt mai thin thin fuh ber niin ka hre lo a, mipuite hian kan thil tih thatte leh sawrkar thar kan neih hnua kan hmasawnna leh hmalaknate hi an hriat a tul hle a ni,” a ti.

Adviser to Chief Minister (Finance) chuan, “Kalphung thar mipui sawrkarin ama puala Budget a pharh ve hnuah khairual thei ang berin hmasawnna a kalpui a, opposition bial hrekna thinlung pu hauh lovin Budget a hmang a ni tih hi mipuiten lo hria se ka duh hle a. Kan ramah rorelna tha leh langtlang sawrkar a awm theih nan Chief Minister Pu Lalduhoma kaihhruai sawrkar chuan thahnemngai taka hma lain, nikumah inrenchem kum kan puanga department hrang hrang atangin nuai 100 tel tak meuh kan hum thei a, hengte hi tul dangah daihzai takin kan hmang mek a ni."

"Tar pension, rualbanlote leh Hmeithaite pension te pawhin malsawmna thar an dawng mek a, Wildlife Worker te, School Chaw chum bakah Health Care hnuaia Nurse te hlawh kan tihpun leh hnathawktute hlawh duhsak taka kan han pek thinte pawh hi sawrkar thar danglamana kan hmuh mekte an ni,” a ti.

Aizawl West-I bialtu MLA chuan, “Kalphung thar mipui Sawrkar hi khawsak harsa zawkte tana ding a ni a, Ration man tihsan chungchangah pawh khawsak harsa zawkte tan buhfai man hi cheng khat pawhin kan ti sang lo, Sawrkarin buhfai lei nan sum tam tak a sen thin hi a lo ziaawm theih nan khawsak awlsam zawkten heti zat hian i khul ve tawh ang u, tiin Retailer ten dik taka an buk theih nan an lawmman kan tihsan sak bawk a ni. Tuialhthei man sawrkarin a tihsan pawh mipuiin an pawm thiam a, a chhan chu a hmanna tur ruahmanna fel tak sawrkarin a siam vek a ni."

"Kan lo sawi tawh ang ngeiin Electric leh tui Bill hi vawiin thlengin kan la ti sang lo a, Sawrkar hmasain Kawng leh Lei thawm thatna atan sum a lo dah pawh vaibelchhe 30 zetin sawrkar thar hian a tipung a, chumai bakah nikum chhung khan vaibelchhe 400 sengin kawng hlui thawm that nan leh kawng thar siam nan sum a theh chhuak a, vawi lehkhatah hmasawnna hi lang duak duak lo mah se, thahnem ngai taka kan thlai chi thlakte hi a rah kan la seng dawn chauh a ni,” a ti.

Adviser to Chief Minister chuan, "Kuthnathawktute thar chhuah Sawhthing theih tawpin kan lei a, India ram puma Sawhthing Market rate tlahniam leh harsatna hrang hrang sawrkarin a hmachhawn chungpawhin theih tawp a chhuah a, a beidawn san ve lo. Intiam zet a ti leh si lo te ai chuan harsana karah pawh theih tawp chhuaha thutiam bawhzuitute hi mipuiten an hria a ni," a ti.

ATL Road chungchang sawiin, "Sawrkar chuan Central Road Research Institute CRRI te ruaiin tha zawk leh tlo zawka siam dan tur a ngaihtuah mek a, vawiin mai ni lo nakin hun thleng sawrkar chuan a thlir a, ZPM sawrkar hian chhim lam mipuite hi a ngaihthah hauh lo a, sawrkar hmasa hun lai anga tum khata sum hman zawh phak bakin sunction khum vak vak ang leh a hnua K-Deposit a dah ngai leh si ang khan Sawrkar thar hi kal a tum lo a ni," a ti.

Mizoram Universal Health Care Scheme chungchangah Adviser to CM chuan, "Sawrkar hamasa hun lai anga vaibelchhe 20 vel daha Health Care kalpui ve tawp leh a hnua leiba tlingkhawm ang kha pumpelh kan duh a ni. Sawrkar hmasa khan kan Private Hospital te hian Pakage rate hmang ve tawh se, tiin a nawr a, an innawr tlu tep tihah a tlawm san leh ta si a, chuvang chuan private hospital rate hmangin MR bill a kal a ngai thin a, re-imburse theite rate chu a dang deuh bik ni te pawhin a lang thin."

"Chuvangin sawrkar chuan standard pakage rate duan tha a ti a, Mizoram-ah kan Private Hospital ten theitawp an chhuah a, investment an hmang tih sawrkarin a hriatpuii avangin duhsak takin Delhi leh Mumbai a hospital thate nen rate in angin a siam sak vek a, chumai bakah sawrkar chuan nuai 50 thleng dahkham a inhuam a ni, private hospital te hnenah pawh an harsatnate sawrkar nen sawiho tura sawm nimahsela vawiin thleng hian a chhanna kan dawng lo hi mak kan ti hle a ni."

"Sawrkar chuan kan private hospital-te nen tangruala mipui tan theih tawpa thawhho kan duh a, ruahmanna famkimlo awmte pawh sawiho kan inhuam reng a, Sawrkar chuan Mizoram Univershal Health Care Scheme thar hi mipui tan hlawhtling taka kalpui ngei hi a duh takzet a ni,” a ti bawk.