ZALEN August 11, 2023 : Excise & Narcotics Department chuan hmun hrang hrangah heroin Kg 3 leh gram 161 an man a, Heroin vanga mante hi The Narcotics Drugs & Psychotropic Substances Act, 1985 (NDPS Act) tlawhchhanin thubuai siamsak an ni.

Excise & Narcotics Department chuan August 10, 2023 (Ningani) khan Falkland vengah heroin gram 258 (Hawng 22) leh a neitu nia puh mi pahnih - Lalthantluang (30) s/o Thangluai, Khawmawi, Rih kawng, Myanmar leh Vanlalsawma (24) s/o Vanlalpana, Zotlang, A-Section, Champhai, tuna Falkland venga khawsa mek nia inchhalte an man.

Excise & Narcotics Department chuan August 10, 2023 (Ningani) chawhnu dar 1:30 khan Tuikhurhlu (Edenthar)-ah heroin Kg 1 & gram 480 (Hawng 121) leh he heroin tawlhruknaa inhnamhnawih nia puh mi pathum – Niengboi (33) d/o V.T. Khawboi, New Lamka, Churachandpur, Manipur; Thlingneihhat (33) d/o P. Rova, Lamka Manipur, (tuna Manipur ram buai vanga raltlan vanga Tuikhurhlu-a khawsa mek) leh Zoramnghak (47) s/o Ropara, Tuikhurhlu (Edenthar) nia inchhalte chu an man. Heroin leh a khawihtute man chhuahnaah hian Excise & Narcotics Department hian Assam Rifles (FIU) te chu phungbawmah an sawm. Heroin phurhna atana hman Santro Car, Regn. No. MZ01-V-0693 pawh hrensak an ni.

Excise & Narcotics Department leh CADS thawkdun chuan August 11, 2023 (Zirtawpni) zing dar 1:00 khan Bawngkawn Brigade vengah heroin gram 109 (Hawng 8) leh a neitu nia puh – Zosangpuii (51) d/o Thantluanga (L), Brigade Bawngkawn nia inchhal chu an man bawk. Heroin phurhna atana hman Maruti Eeco Van, Regn. No. MZ01-K-3727 pawh hrensak a ni. 

Excise & Narcotics Department chuan August 11, 2023 (Zirtawpni) chawhma dar 1:30 khan Keifang khaw dai, Champhai Road-ah Heroin Kg 1 & grams 314 (Hawng 105) leh a neitu nia puh mi panga - Monir Uddin (30) s/o Ajir Uddin Laskar, Pakuwapunji Bhaibonti, Sohalomara F.V. Hailakandi, Assam; Golam Wazid Bhaubhuiya (38) s/o Aftab Uddin Bharbhuiya (L) leh Mayazul Hoque Bharbhuiya (37) s/o Jafir Uddin Bharbhuiya, Ramnagar, Cachar, Assam-a cheng ve ve; Barhan Uddin Tapahar (43) s/o Basir Ali Tapahar leh Salman Uddin Laskar (23) s/o Soraf Uddin Laskar, Dholai, Hailakandi, Assam-a cheng ve ve nia inchhalte an man. Heng heroin te hi State pawna hralh tum mek lai a ni a, heroin phurh kualna atana hman Mahindra Bolero Regn No AS-11EC-5417 leh Maruti Swift car Regn No AS-11Z-4750 pawh hren sak nghal an ni.

Heroin vanga mante hi The Narcotics Drugs & Psychotropic Substances Act, 1985 (NDPS Act) tlawhchhanin thubuai siamsak an ni. Heroin vanga mante hi thiamloh chantir an nih chuan kum 10 atanga kum 20 thleng Jail tantir leh pawisa 1,00,000 atanga 2,00,000 thleng chawitir bawka hrem theih an ni ang. Ruihhlo khuahkhirhna Dan hi a khauh hle a. Ruihhlo khuahkhirhna dan bawhchhe lo tur hian Excise & Narcotics Department chuan mipuite a ngen a ni.