Aizawl:Excise & Narcotics department chuan December 14, 2020 atang khan special drive an nei mek a, special drive hi January 3, 2021 thleng neih a ni and.

Excise & Narcotics hotuten Zalen an hrilh danin Aizawl khawpui kawtchhuah hrang hrangahte duty insiamin a tul angin hma an la tih an sawi a, kawng dunga hruipawh ang chi kha chu ti lovin khawlaiah patrolling neiin theihtawp an chhuah niin an sawi a. Rangvamual leh phunchawngah te ni khat kar danah zu factory tichhiain an kal thin niin an sawi bawk.

Mizoram sawrkarin dan thar a siam angin Assistant Commissioner chin chung lamte chuan zu rui, rui chunga lirthei khalh, vantlang hmuna zu in leh dan bawhchhiatna tenau deuhte chu court kalpui kher lovin a hmunah pawisa an chawitir tawh dawn niin an sawi a. Sum chawitir hi an thiltih leh dan bawhchhiat azirin Rs. 5000 thleng chawitir theih a ni a. Dan bawhchhe tam ber erawh court-ah la kalpui zel tur a ni tih an sawi bawk.