Ni 9.12.2020 zanah hliam rapthlak tak tuarin ama din damdawi in ngeiah Dr. Laltanpuia chu zawn luh a ni a. Damlo a en thinna khumah ngei chuan thichhawngin a mu dâng bai mai a, a thisen chhuak pur pur chuan a nunna a luan ralpui riai riai a. Amah buaipuitu a thiante hnenah chuan zawi têin, “Ventilator ka mamawh ang, oxygen min pe ula, ka ke kha sang deuhin chawi ru aw,” a tih chu a tawng hnuhnung ber a ni ta. Pa chiai ngai lo kha a thawk tawp thlengin a la chiai chuang lo!

Inzaina pindanah lak luh a ni a, a hliam a nat em avangin engmah tih theih a awm tawh chuang lo. A nunna chhan tuma theihtawp chhuahtute chu hrilhhai takin an inen a, sawi tur an va vân em! Zan dar 10.05-ah chuan khawvelin a mikhual duhawm chu a mangtha hlen ta a ni.

Khawvelin kum 43 chhung Laltana a lo mikhual ve hi a inchhir lo ngawt ang. Mi tam tak tan malsawmna a ni miau si. Veng chhunga doctor kan neihte pawh veng mipuiin kan hlawkpui bik viau tawh lohna khawvelah hian ani chu ‘Kulikawn doctor’ an ti a nih chu! |henawm khawvengte tana inpe, mi dangte tanpui tura inpeih reng mai a ni tih a chiang e. Social media lama amah thlahna thuziak hrang hrang atangte hian a hlutzia a hriat vek.

Laltana nunah khan zir tur ka ngah lutuk. Mi zawng zawngin amah kan hriat dan a inang vek mai hi a ropui ka ti. Mi tam tak hi chu kan awmna hmun leh kan bula awmte azirin kan mizia a dang thin. Kan chanchin sawitute azirin min sawi dan a dang fo ang. Kristian tha tak anga min sawitu an awm laiin kan tenawm ruk ve zia sawi thei an awm ang a. Hlim thei tak leh nelawm tak nia min ngai an awm laiin mi thenkhat chuan thinchhia leh chapo min lo ti daih thei. Pawn lama min hmututen hlim thei leh tawng duh anga min sawi laiin in chhunga ka chenpuite chuan kheuhbeuh leh phunchiar zet min ti daih thei. Mi hausaten fel min tih laiin mi retheite chuan ka sualzia an hre mahna. Awmna hmun azira mize danglam thin hi kan tam. Kawmte azira inthlakthleng mai thin kan ni fur ta ve ang. Dr. Laltana erawh chu mi tinin amah kan hriat dan a inang vek. Zaidam, ngilnei, inngaitlawm, hawihhawm, tlawmngai, mi lian leh mi chhia tumah thliar lova ang khata enkawl thin a nih thu hi kan hriat dan vek a ni. A awmna leh a mi kawmte avanga a mizia thlak ve chi a ni lo. A quality a sang tlat!

A thih khan mi lian an tap a, mi rethei an tap bawk. Tu emaw tap thiam tak leh chham lungkuai thiam tak hian min vel tap chawp thei viau. Insum tak maia patling inpet fan fan te, thiante kuah ngawt ngawt chunga insut hlawp hlawpte, mi dang pawh zah zo lova kuk rawih rawihte kha Dr Laltana thisen zawmpuite an ni lo va, tu emaw tapin a velh chawp mai mai an ni lo.  Amah ngainaa ui tak taktu, thinlung tawt lutuk puak chhuak an nih kha a chiang tlat. Amah hre tawh tan a ui loh theih loh a, mittui a far lo thei lo a, tah a phu em a ni. A thihna chungchang sawi reng rengin, “Khatiang pa tha khan hetia thih hi a phu lo,” an ti vek!

Amah hre chiang bertu, a zirpui, pindan khata cheng dun, a thlum a al eiza, a unaupa ang chiah, a thian tha ber ni bawk, a thawhpui Dr Rinawma’n a vuina huna a thusawi khan Laltana nun a hrilhfiah ber. “Laltana hi zawt ila, la sawi thei se, a nupuiin chatuan nunna a neih hi a duh ber a ni ang, chumi atan chuan mi tin tawngtai ila, he thihna hi malsawmnaah lo chang rawh se,” a ti.

A thih chhanah khan tinzawn kan nei thup. A thihna chuan a hmangaih, thurawn tam tak karah pawh a tlansan duh hauh loh a nupui chu kai harh se la, chatuan nunna neih phah se tih chu a duhthusam a nih dawn chu! Amah hrechiangtu berin a sawi alawm, a rintlak ang. Laltana rilruah hian phuba lak lam a awm ve ngai lo a niang. Mi nunnem, mi pawisawi ngai lo, rilru chhia pu ve ngai lo a ni tlat alawm. A ropui asin.

Tu emaw siam that a tum ngat ngat a. A martar-pui ta a ni e. A chenna in leh damdawi in chhuata a thisen baw darh zuih mai khan a in chhungah leh damdawi inah thu tam tak sawi zui se la, tu emaw talin chatuan nunna an neih theih nan he thisen hian chhandamna thu chu puang mawlh teh se. Chhandam kan nih nan Lal Isua thisen a luang ral tawh a. Laltana thisen luang ral vek hian a hmangaihte thinlung chu Lal Isua hnen luan thlenpui hlauh se la aw! Chu chu a duhthusam ber, ngawi renga a tum ngat ngat, sawiselna karah pawh beidawng hauh lova a vawn tlat, a thihchilh tak hial chu a ni dawn si.

A phone profile-a a thu ziah chu “family man” tih a ni. Amah a inhmuh dan, a intar lan duh dan hi a nihna dik tak a ni. Chhungkaw pa a ni. A fate tana pa nih a tlinziate kha aw! Zingah a tho a, a fate a buaipui nghal thin. Sikulah a hruai tam hle a niang, sikula an fate hruai ve nu tam tak chuan nupui sun tawh emaw an ti. Nupui a nei lo a nihte an ring a ni awm e. Ni lo, nupui a sun lo, nupui pawh a nei. A nupui nep vang pawh a ni lo, chhan dang a awm lo, a fate hi a ngaihsak em vang a ni zawk. Family man a ni tlat alawm!

A fate hian an ngai asin, pa an nei hliah hliah asin! A tel lo chuan engtin nge an awm tak ang le? Pa nei lote ngaihsak tlattu Pathian chu an pa a ni tawh dawn tak e. An ngaihtuahawm loh ang. Laltana aia family man ropui zawkin a enkawl tawh dawn tak e.

Damdawi inah a kal tlai thin hle. “Engtik nge a lo kal dawn?” han ti ila, fiamthuin, “Lal Isua lo kal hun tur leh Laltana lo kal hun tur a sawi theih loh,” an ti thin. Chhungkua a buaipui hmasak thin avangin a kal hma thei thin lo a lo nih awm chu! A nunah hian chhungkua a dah hmasa ber thin a, a ngai pawimawh ber a ni a, a tawp dan erawh chu a lungchhiatthlak hle si!

Tlaiah hian ei tur siamna hmun atangin an chhungkaw zanriah tur a khai haw thin. A nupuiin ei tur a lo siam ngai loh vang a ni lo ang. A nupui rintlak loh vang a ni lo ang. Nupui fanaute duatna lantir a, an ei tur khai haw mai kha a nuam a ti a ni. Family man a ni tlat alawm!

Mi tam takin an chhungkaw rorelpui an tum thin. An thurawn a la ngai lo. Mi tam tak thurawn angin awm dawn se an chhungkua chu a keh darh dawn pawh a ni mahna. A duh ngai lo ang. Family man a ni tlat. An chhungkaw harsatna emaw, buaina emaw (an nei a nih pawhin) khawiahmah a sawi ngai lo. An chhungkuaa tu emaw chanchin chhe lam a sawi ngai lo. Chhungkaw pa a ni tlat. Hlim takin hna thawk turin a lo kal a, hlim takin a thawk a, hlim takin in lam a pan thin tih chiah kan hria. A bak chu tuman kan hre lo.

A thianpa, Dr. Rinawma chuan, “Laltana kha pasal tha tak a ni a, pa tha tak a ni a, makpa tha tak a ni bawk. Ama chhungte ngei thik thamin Mary vua leh vangte hi a ngaihsakin a buaipui thin. Mary chhungte hian Laltana-ah hian sawisel tur an neih ka ring lo. A tan hian a sum neih hi a khawh ral khât khawp mai a, a nupui leh a fate tan erawh a ui lo. Kar hmasa mai khan erawh mak tak maiin phone tha tak singli chuang man leh smart shoe to ve tak a lei ve mial,” a ti. Laltana kha chhungkaw ngaihsak mi, chhungkaw pa a ni tlat.

Mi dang zah thiam em em, hawihhawm reng mai Dr. Laltana khan a daktawr hna hi a thiam em em a. Specialist a ni lo a, general practitioner a nih ang ngeiin eng subject pawh hi a hre em em vek mai a ni. A ni ang hian MBBS daktawrte hi inzir peih vek ila chuan specialist ho clinic-te hi a lun lutuk bik lo ang tih ka ring. Ama enkawl bik duh damlo an tam lutuk tlat. Mi bik a ni. Mi bik kan chân a ni.

Dec ni 1 tlai dar 3.47-a min biak a tumna missed call chu a tuk zingah ka hmu chauh a. December ni 2 zing dar 10.56-ah ka va bia a. Medical thila hmalakna tur rei fe kan sawi dun. Kan inbiak hnuhnung ber tur tih hria ila, “In dam tlang em? In hlim em? In nu a tha maw? In fate an dam em?” te pawh lo tih tur a nia. A hetih tur hria ila thu dang zawh tur pawh ka ngah. Zawt ta pawh ni ila hlim takin an dam tlan thu leh an that tlan thu bak min hrilh chuang lo ang.

Kan inhriatna a rei tawh a, kan innel em em a. Han innel deuha inzah lohna lantir ta mai thin kei ang hi erawh a ni ve lo. Mi zingah ka zahawmna min vawnsak tuma, “Sir” min tilui hram hramtu, Dr. Laltana hi ka zah a, ka ui a, ka ngai dawn hle a ni. A nungchang leh mizia zawng zawng hian zah a phu ngawih ngawih a. ‘Sir’ tih pawh a phu ber zawk. Amah uitu zawng zawngten a miziaa zir tur tha hi zir vek ila, chu chu amah kan ngaihhlutzia kan tihlan theih dan tur hlu ber chu a ni tawh mai dawn a nih hi.

Mangtha aw, Sir Laltana.