ZALEN August 8, 2026: MNYF Headquarters huaihawtin vawiin khan ILP chungchânga Chief Minister Lalduhoma thusawi duh lohna lantirna a chenna bungalow kawtah neih a ni a, CM hi pawndum nena lo hmuah a ni a, mahse, Chief Minister hi a haw hun tura ngaihah a thleng lo a, ruah a sur zui tak bawk avangin MNF thalaite hian an tin san a ni.

Chief Minister hi Assembly House lama meeting neih naah a tlang nghal niin thudawn a ni. MNF thalai te hian Chief Minister Office-ah Ngaihdam dil tur leh a thusawi sut tura phutna lehkha chu thehluh an tum a, mahse, dawng tur an awm loh avangin a office kawngkhar-ah lehkha hi an tar ta tho a ni.

CM an hmuahna hunah hian MNYF Thalai President Gogo Lalremtluanga chuan thu sawiin, Zoram mipuite'n duhsak taka CM dinhmuna an dah Lalduhoma chu Mizo mipuite harsatna hre êm êm tawh tur a nih laia Peace Accord chungchângahte, ILP chungchângahte thalaite rilru hruai khawlo zawng leh mipui tithlabâr zawnga thu a la sawi duh chu a pawi takzet a. Kal ngaihna hre lo ZPM sawrkar hi khalh ngil tur leh Chief Minister Lalduhoma hi kawng dik kawhhmuh turin MNF Thalaite an inpeih reng tih a sawi.

Ex-MNA Headquarters President Rochungnunga pawhin thu sawiin ILP hi Mizoram sawrkar rawn lo chuan paih theih a ni lo tih hre lo CM neih hi a vanduaithlâk a. Remna Thuthlung hian Mizoram mipui zawng zawng min huap a. Tualchhung mi leh rammute'n thisen leh nunna hlana an tawrhna atanga lo piang a ni a, Mizo hnam tan a hluin a tha a. Mi tlawnna atân a pal pakhat pawh chawi sawn an phal loh thu a sawi bawk.

PAMRA President Lalbiaa pawhin thu sawiin, "Pu Lalduhoma'n ILP chungchâng bakah Remna Thutlung a sawi hnawm fo mai hi Peace Accord MNF Returnee Association chuan kan ngai thei lo hle a. Remna leh muanna a lo awmna atâna hma latu NGO zawng zawngte leh Mizoram Kohhran Inzawmkhawm pawlte bakah Pathian pawh zah lova Pu Lalduhoma'n Remna Thuthlung a sawichhia hi a na kan ti a, pawmzam mai harsa kan ti a. Mizoram leh India sawrkar thuthlung hi sawihnawm chi a ni lo a, venghima hmang tangkai tur zawk kan ni a. Zoram Hnam Sipaite chuan kan Humhalh tlat dawn a ni," a ti.

Kalkhawmte chuan Chief Minister Lalduhoma chu pawndum nena lo hmuakin ILP chungchânga a thusawi duh lohna lantirin au rualna an nei a ni.