Aizawl June 12, 2023 : Vawiin khan Food, Civil Supplies & Consumer Affairs Minister K.Lalrinliana chuan Northeast Special Infrastructure Development Scheme kaltlanga khum 100 awm theihna tur Kolasib District Hospital sak mek te, Supply Godown leh Chakai Farm te a tlawh.

Minister hian Dialysis Building, Blood bank, Laboratory leh ward hrang hrang a endik a. District Hospital-in bawlhhlawh tih ral kawng a harsatna an neih te sawi ho nghal a ni a, district Hospital-in harsatna a tawh mek sutkian a nih theih nan June ni 14 hian District Urban Development Office hotute nen sawi ho tur a tih a ni.

District Civil Supplies Office tawhin, Supply Godown-a buhfai dinhmun chu a hmunah a that leh that loh te a endik a. National Food Security Mission hnuai a chhawngkaw tin in chanvo an neih te dik tak a pekchhuah a nih theih nan thahnemngai tak a thawk zel turin thawktute a chah. 

K. Lalrinliana hian Dumlui-a Chakai Farm pawh a tlawh nghal a, he hunah hian DFCO Lallianpuii chuan a tawiawm a, DFDO chuan Chakai Farm chu kar tin an vilpui thu leh tun dinhmunah Farm Pond engemaw zah ah Chakai an inthlapun tawh thu leh hrisel takin an enkawl mek thu minister hi a hrilh a ni.