Aizawl: FCS&CA Minister K Lalrinliana chuan nimin khan Covid-19 hri leng do nana hmalakna pakhat, Bairabia lirthei lo lut khalhtute endikna, screening point thar sakna tur hmun a enfiah a, bul tan nan Bairabi Village Level Task Force hruaitute hnenah Rs. 20,000 a hlan bawk.

Minister chuan Bairabi Medical team leh VLTF hruaitute kawmin an harsatnate a sawipui a, Covid-19 dona kawnga Bairabi khawtlang hruaitute leh thawktute thawhrimna leh inpeknaah lawmthu a sawi. Bairabi VLTF hruaituten an lo thlen tawh angin screening point chu mihring chen lohna hmunah sawn tura hmalak a nih theih nan a bultan nan Rs. 20,000 a hlan nghal bawk a ni. Medical team-ten thawktu indaih lohna an lo thlen pawh Health Minister a sawipui tawh thu a sawi a, rang taka hmalak thuai a nih tur thu a sawi bawk a ni.

Minister-in Bairabi screening point a tlawhnaah hian Mizoram Timber Transporter Asso- ciation hruaituten Supply Minister hnenah an harsatna an lo thlen a, tun a Bairabia thing dah khawl sa thawnchhuah theih chhung chu September 30, 2020 thleng chauh hun a awm tawh thu an sawi a. Chutih lai chuan wagon 189 vel thing chhekkhawl sa a la awm thu te, Covid-19 vanga a hun taka thawn chhuah thin a nih loh avangin thing thawnchhuah tur tam tak hlutna a tlak hniam thu leh labour chungchanga harsatnate an lo sawipui bawk a ni. Mizoram Timber Transporter Association hruaitute chuan tun a Bairabia thing chhek-khawl sa awm mekte thawn chhuah nan thla 2 tal thawnchhuah hun pawhsei a tul thu an sawi a ni.

Bairabi screening point-ah hian Medical Officer pakhat leh Laboratory Technician pahnih duty an awm a, staff pali dah belh tura ruahman mek a ni. Bairabi screening point kaltlang hian mi 13813 endik tawh a ni a, September 12, 2020 atangin Rapid Antigen Test neih tan niin mi 446 endik tawh an ni bawk.