African Swine Fever chu hun engnge maw chen a reh hnuin Mizoram-ah a inlan leh mek a. ASF hri vang hian kum 2021 leh 2022 chhung khan Mizoramah vawk thi leh suat 70,147 an awm a. ASF vanga vawk thi leh suat hi hun eng emaw chen a awm loh hnuin May thla vel atang khan hri vanga vawk thi a awm tan leh a. Champhai district Ngur khua leh a chhehvelah hri vang hian vawk an thi a. Champhai bakah Kolasib district a khaw thenkhatah hri vei hmuh an ni bawk.

Mizoramah chuan ASF hi kum 2021 khan hmuh tan a ni a. Lunglei district-ah Lungsen khuah vawk eng emaw zat a thih avangin mi thiamten an enfiah a, vawk natna chi khat ASF vanga thi an ni ngei a ni tih March 21, 2021 khan an finfiah a. Heta tang hian Mizoram khaw hrang hrangah he hri hi hmuh chhoh zel a niin vawk thi leh suat pawh thahnem tak an awm tawh a ni.

AH&Vety department chhinchhiah danin ASF hri len hmasak, kum 2021 khan Mizoramah vawk thi 33,417 an awm a, hri len hnuhnung zawk, kum 2022-ah vawk thi 12568 awm lehin kum hnih chhunga ASF vanga vawk thi zat chu 45,985 a ni a. Hemi kum hnih chhung hian hri vei nia hriat vawk suat 24,162 a awm bawk a ni. 

Vawkin ASF an kai chuan khawsik sang tak an nei a, an lo chauin a then chu an khuh thin a. Vawk zawng zawngah erawh a natna lanchhuah dan a inang vek lo a, vawk rai laiten an tuar deuh bik nia hriat a ni. ASF natna kaite hi dam chhuak an tam lo hle a, a tlangpuiin an thihpui deuh zel avangin mi thiamte lu pawh a hai hle.

ASF natna hrik hi boruakah hun rei tak a dam thei a, mihring tan chuan a hlauhawm lem lo nain he natna thehdarhtu a nih theih avangin fimkhur a pawimawh hle niin doctor-ten an sawi. ASF natna hrik hi vawk mai bakah vawksa atanga siamchhuah thil chi hrang hrangahte a awm theih avangin fimkhur a ngai hle. 

A LO CHHUAH DAN

African Swine Fever (ASF) hi kum 1907 khan Kenya (Africa) ramah hmuh tan a ni a, an hmuhna khawmualpui hming chawiin African Swine Fever tih phuah a ni a. Kum eng emaw zat chhung chu khawmualpui dangah he hri hi hmuh a ni lo a, kum 1957 khan Portugal-ah hmuh a ni a, hei hi Africa khawmualpui pawna hri an hmuhna hmasa ber a ni.