Khawvel a changkang zel a, faina kawngah pawh Mizoten hma kan sawn zel. Mizoram khawpui ber Aizawl pawhin faina kawngah hma a sawn chho ve zel a, tun dinhmunah phei chuan India ram khawpui fai ber zinga mi a ni chho ta a, chutihrual erawh chuan hmasawnna tur a la tam hle thung.

Aizawl khawpui faina kawnga hma latu zinga mi Senior Sanitation Officer H.Lalmuankima chuan Aizawl khawpui faina atan hian tuktin mi 120 chuangin hmun an phiat thin tih a sawi.

Zalen-in a kawmnaah Senior Sanitation Officer chuan tun dinhmunah Zemabawk atanga Tlangnuam kawn, Vaivakawn leh New Capital Complex thleng kawng lunlai chu tuktin motor tlan hmain sweeper ten an phiat thin niin a sawi a. “Sweeper hi 120 chuang deuh kan nei a, tuktin motor tlan tam hmain kan phiatfai thin a. Zing kara phiat hman lo leh engemaw harsatna nei chuan chaw ei khamah te an phiat leh thin a, theih tawp kan chhuah zel a ni,” a ti.

Senior Sanitation Officer chuan hmunphiat te chu sector 6 ah thenin AMC building Thuampui, Upper Bazar a Aizawl Police Station bul, Zodin Square a Mahatma Gandhi lim hnuai, Sikulpuikawn a Sanitation office leh Vaivakawna Trade & Commerce building ah te kokhawmin roll call te an neihpui thin bakah an hnathawh turte an siamsak thin niin a sawi bawk. Bawlhhlawh paih motor 1 an la kawl nia sawiin Senior Sanitation Officer H.Lalmuankima chuan he motor hmang hian Governor Secretariat leh New Capital Complex a bawlhhlawh te chu an paih thin niin a sawi bawk. Ek paih motor pawh an la neih ve avangin a hman man to lutuk tur an control ve nia an inhriat thu sawiin Senior Sanitation Officer chuan, “Tunah hian ek paih motor hi 3 kan la kawl a, kan lirthei hi mipui te hman (hire) theih turin kan ruahman a. Ek paih man hi trip 1 Rs. 3200 kan ti a, kan rate avang hian ek paih man to lutuk tur pawh kan control ve niin kan hria a, keini hi awm ta lo ila chuan a rate pawh hi a to hle in kan ring a ni,” a ti bawk.

Aizawl khawpui faina chungchangah hian pa pakhat pawhin, “India ram khawpui hi ka tlawh ve nual tawh a, khaw fai tak tak anga lang pawh hi a tlangdung a fai viau lai hian a bul lawkah bal tawp tak tak hi hmuh tur a awm leh thin a. Aizawl hian duhthusam lo mah se, kan fai sawtin faina pawh hi a kai rual khawpin ka hria,” a ti ve bawk.