Mizo hian kan pi leh pu atangin hnam dang chawhmeh neih ve loh eng emaw zat kan nei a. Chung zinga pakhat chu bekang hi a ni awm e. Hnam dang chuan bekang hi an um kan hre lem lo a, Mizote erawh chuan chhhum hmin hnuah kan um leh thin. Ei sual awlsam tak a niin kum tin deuh thaw ei sual vanga damdawi in kalpui an awm thin a. Vanduaithlak taka nun chânte pawh an awm hial tawh.

Tun hnai kum 6/7 kalta han thlir ila, bekang leh pa ei sual vanga damlo mi eng emaw zat an awm tawh a. Bekang ei sual vang (?) hian May 9, 2014 khan Bungtlang khua, Lawngtlai district-ah mi pathum an thi a, mi eng emaw zat damlo awmin Lawngtlai damdawi in panpui an ni a. Vanduaina thlenna hmun hi health department hotute chuan an tlawh hial a ni.

Hei bakah June 6, 2014 khan bekang ei sual vangin Farkawn PHC-ah mi 15 admit an ni a. July 15, 2017 khan Dinthar leh Tuikualah bekang ei sual vanga Civil Hospital, Aizawl panpui damlo mi 53 an awm a, an zinga mi 18 chu an nat deuh avangin admit an ni a. Heng damlote hi pumna leh luakchhuakten an awm a ni.

January 22, 2018 khan Mamitah bekang ei sual vanga damlo, damdawi ina inentir mi 35 lai an awm a. Heng mite hi pumna, luak, kawthalo leh khawsikin an na a, an zinga mi 17 chu damdawi inah enkawl an ni.

Tun hnai maiah pawh bekang ei sual vanga damdawi in pan an awm nual a. July 19&20, 2022 khan Thenzawlah bekang ei sual vangin mi 20 chuang damdawi inah hruai an ni a. Nikum August 10, 2023 khan Darlak-ah bekang ei sual nia hriat mi 16-te chu Mamit damdawi inah hruai an ni bawk a. Tun hnai mai, March 9, 2024 khan Khumtuang khuaa kohhran pakhat chuan sum tuak nan bekang an zuar a, bekang ei zinga mi 33-te chu damdawi inah admit an ni.

Bekang ei sualte hi a tlangpuiin pumna, khawsik, luakchhuak leh chau ten an awm thin a. Bekang ei sual chhan ber hi a sawngbawlna a thianghlim tawk loh vang leh a chi tura dah, damdawi pawlh tawh um vang niin thenkhat chuan an sawi a. Doctor pakhat chuan ei leh in tur reng reng thianghlim tak a sawngbawl thin a ngai a, tho leh rannung dangten an bawm chuan natna hrik an thehdarh thei a, chu chuan mihringte-ah harsatna a thlen thei niin a sawi.

Health department chuan bekang ei dawn reng rengin khawia mi nge tih te, ei atan a him em tih te, an dahthatna a rei tawh em tih leh a um dan a felfai tawk em tih te finfiah hnuah chauh ei thin turin mipuite an ngen.