Bible Society of India, Aizawl Auxiliary chuan Mizo leh English awm kawp parallel Bible an tih mai, Mizo Bible Revised Version: Diglot with English Standard Version' an buaipui mek a, tluang taka hna an thawh theih chuan nakum kum tawp lamah zawh theih an beisei.

Bible Society of India, Aizawl Auxiliary thawktu ten Zalen an hrilh danin Bible letlingtu te hian Thu-thlung thar leh Sam bu chu an zo tawh a, India ram pumah inkharkhip 'lockdown' kalpui anih avangin hna an thawk chak thei lo a. Thla thar August hian harsatna a awm loh chuan lehlin hna hi chhunzawm leh an tum a, tluang taka hna an thawh theih chuan nakum kum tawp lamah chuan zawh theih an beisei tih an sawi.

Bible Society of India, Aizawl Auxiliary thawktu te chuan India rama Auxiliary zingah kumhlui 2019-2020 report la tichhuak lo mah se, Aizawl Auxiliary chu sum thawkchhuak hnem ber anih leh ngei an ring tih an sawi a. Aizawl Auxiliary hian Mizoram bakah Tripura leh Assam State-a district pathum (Cachar, Karimganj leh hailakandi) te a huam a. Kum kalta 2019-2020 chhunga Aizawl Auxiliary thawhlawm beisei zat chu Rs. 3,11,23,000 niin thawhlawm tling khawm chu Rs. 4,96,15,921/- a ni a, budget hi Rs. 1,84,92,921 in an khum a ni. BSI, Aizawl Auxiliary hnuaiah hian Branch 55 awmin chung zingah chuan Aizawl North I Branch chuan an ti tha ber a, kohhran mal ah chuan Tuikual PCI in an ti tha ber thung.

BSI, Aizawl Auxiliary hmunpui 'Bible House', Upper Khatla a mi chu leimin vangin luah chhunzawm theih a nih loh avangin Pi Zaii hall ah an awm mek a. Tunah hian MUP Office bula sawrkarin ram a pekah 'Bible House' tur hi sak mek a ni a, nuai 1000 chuang senna tur a niin a basement hi kumin chhunga sak zawh a, luah hman tum a ni.

BSI, Aizawl Auxiliary hian semdarh hna lam pawh theihtawp an chhuah a, kum kalta khan Bible leh a kaih-hnawih 879801 sem-chhuah a ni a. Nikum atang khan Aizawl Auxiliary chhungah project New Testament (Thuthlung Thar) a thlawna sem chi tih-chhuah tan a ni a, Bengali, English leh Hindi tawnga chhut a ni a, a thlawna sem a ni.