Covid-19 hri leng avanga buaina leh harsatna awm mekah Mizoram sumdawng ten damlo enkawlna leh buaipui ngai te thuam, PPE suit chu nasa takin an buaipui mek a, Women Polytecnic lam pawhin damlo buaipuite thuam hak tur hi an thui ve reng bawk.

Mizorama damdawi zuar hriat hlawh RS Drugs Store chuan PPE suit bakah a ken tel mask, glove, shoe cover, tarmit leh PPE kit te chu phai lamah an chah ve reng a, an chah hmasak berin hak 400 an chah thleng a, heng zinga 300 hi sawrkar chuan an laksak nghal a, a dang te hi private hospital lamah an pe thung. Anni hian nimin mai khan suit leh a ken tel te hi hak 500 an ti thleng leh a, heng ho hi chu private hospital lamah leh MLA te chan turin an ruahman a, glove, mask, tarmit leh PPE kit dang te a hranpa-in thahnem tak an chah thleng bawk. PPE hmanrua hrim hrim hi India ramah pawh duh ang lei tur a vang hle tih RS Drugs Store neitu Cephas Lalrinenga Ralte chuan ZALEN a hrilh.

PPE suit thui hian Vakiria chuan tunlai hian theihtawp an chhuah a, anni hian a tir phat atangin he hna hi an thawk a, sawrkar lam chu dawr hmasak berah hmangin a thlawna thui sak an inhuam thu an hrilh a, mahse, sorkar lam hian an order mai lo. Hetih lai hian private hospital lam chu tuan rang zawkah an tang a, Ebenezer hospital leh Grace hospital lam chu an thui sak hmasakah an tang. Vakiria hian heng damdawiin te PPE suit hman tur hi a thlawn vekin a thui sak a ni. Tunah hian sawrkar hman tur an thui leh dawn mek.

Women Polytechnic lam pawhin PPE suit chunga hak tur hi an thui ve reng a, tuna an dinhmunah hak 300 vel thui turin an inruahman a, an zirlai in-volunteer ten heng thuam hi an thui mek a, Principal Susan Ralte chuan, "Kan facebook group-ah ngenna kan siam a, chuta volunteer te chu thui turin kan pe chhuak a, college lamah hian volunteer pariat kan awm bawk. Sample tur kan hmuh mai loh avangin bul kan tan lawk lo a, kan neih hnuah hi chuan hma pawh kan sawn hle. College lamah hian a zai lam kan thawk a, an thui zawh hnuah kan seal leh thlap a, him thei ang ber turin kan buatsaih," tiin a sawi.