A hming han sawi ngawt pawhin Mizo mipui tam tak lung a tileng a, hmun nuam leh sa tinrengte tuallenna hmun niin mithhla chuan a hmu nghal a. Buannel hi Burma ram chhungah awmin kuminah ringawt pawh tlawhtu mi sang tel an awm tawh a ni.

Buannel hi kan pi leh pute chuan ramsa chenna hmun niin an ngai a. Myanmar (Burma) rama Hmunluah khua atanga chhimchhak dep, Hmunluah khawlu tlang liam, mel sarih vela hla, Luangdam lui bul lawka awm a ni.

Hmunluah thleng chauh hi motor-in a thleng thei hrih a, heta tang hi chuan ke-a fehkawng tum ang tiat velah kal a ngai tawh a, ke-in a thlen theih a ni.

Mizo thawnthuah chuan Buannel hi ramhuai tha chi, Lasite awmna hmun a ni a. Lasi tlangval, Lalchungnunga chuan Chawngtinleri chu nupuiah neiin, Chawngtinleri chu ramsate siamtu leh an chunga thuneitu angin an ngai a. Chuvangin Mizo pasalthate chuan ramvahna atan an hmang thin a, Chawngtinleri pawh hi mihring angin a inlar thin niin an sawi bawk.

Buannel ram chhunga phul zau zawng hi mel hnih leh a chanve zet niin an sawi a. Sabual hmun leh puk thuk tak takte a awm a, a tlang mawina tizualtu leh chei mawitu, Bingbi, mi thenkhatten Buannel Par an tih leh Chhawkhlei par sen leh var a awm bawk a. Chhawkhlei hi chu February leh March thla tir velah an par thin a ni.

Buannel hi Mizoram atanga chuan Zokhawthar katlangin kal a ni ber a. ZALEN zawhna chhangin Zokhawthar VCP Mamuana chuan kuminah ringawt pawh Mizoram atanga Buannel tlawhtu hi an tam tawh hle tih a sawi a. “Sawrkar laipui thupekin India leh Burma inkalpawhna gate khar a nih hnuah tui tlem lai te a nih avangin Zokhawthar thlang deuhah Burma ram kaina tur kan siam a. Heta tang hian Buannel kal duhte chu an kal thin a; mahse, Assam Rifles lamin FMR chhuanlamin he gate hi an kalh a. Inrinni kalta thleng kha chuan zalen takin an la kal a; mahse, tun dinhmunah chuan an remti tawh lo a ni,” a ti.

Hetih lai hian Buannel Board Secretary Maneiha chuan an ngenna angin Assam Rifles hian gate hi an hawng leh tawh a, a kal duhte pawh an kal leh thei tawh niin Zalen a hrilh.

ZALEN zawhna chhangin Buannel Board Treasurer Remlalfaka chuan mahni lirthei keng duhte tan a ken theih bakah Tiau atangin bike hire tur a awm reng tih a sawi a. Buannelah chuan thilmak em em a awm hran lo a, ngaw dur khup kara phul leh pangpar bakah mual pawng awmte chu mipuite kal chhan ber niin a sawi a. Lirthei neitute hnenah hian pawisa an la/khawn thin tih sawiin chung pawisate chu kawng siam that nan an hmang thin niin a sawi bawk.

Zokhawthar atanga Buannel kal tur hian Lianhna khaw hlui, Tuichirh leh Hmunluah te paltlang a ngai a ni.