ZALEN October 27, 2024 : Mizorama kohhran hrang hrangte thawhhona leh inpumkhatna tura hmalatu tur Council of Churches in Mizoram (CCM) chu vawiin Pathianni hian Mission veng Kohhran Biak Inpuiah Mizoram Kohhrante Inpumkhatna Joint Committee chairman leh Synod moderator ni bawk, Rev. R.Vanlalnghaka chuan a hawng dawn ta a. Nimin chhun dar 12:30 khan Mission Veng Kohhran Biak Inah rorel inkhawm neih a ni.

CCM a pian theihna atan hian Mizo Theological Association chuan kum 2010 vel atang khan hma an la tan a, thawhhona atana joint meeting hmasa ber chu January 24, 2023 khan Baptist Church of Mizoram (BCM) Headquarters Office, Sêrkawn, Lunglei-ah neih a ni a. Chutah chuan Mizoram Presbyterian Church (MPC) aiawh mi paruk; Evangelical Church of Maraland (ECM) aiawh mi pali; Lairam Isua Krista Baptist Kohhran (LIKBK) aiawh mi panga; The Salvation Army (SA) aiawh mi paruk leh BCM aiawh mi pariat an kalkhâwm a. Kalkhâwmte hian kohhran inpumkhatna kawnga council din chu tha an ti tlâng a.

A ruangâm tûr (structure) duang tûrin kohhran tin atangin mi pahnih zêl ruatin member 10 awmin Drafting Committee a din nghal a. Drafting Committee ruahmanna enho tûrin joint meeting chu Booth Manson Hall, The Salvation Army Territorial Headquarters, Tuikual Aizawl-ah May 19, 2023 khan an kalkhâwm leh a. Chutah chuan chairman, secretary leh recording secretary-te bâkah MPC atangin mi pasarih; BCM atangin mi paruk; ECM atangin mi panga; SA atangin mi panga; LIKBK atangin mi paruk; EFCI atangin mi paruk; IKK Bualpui (Ng) atangin mi panga; an vaiin mi 43 an kalkhâwm a ni.

He mi tum hian a ruangâm tûr Drafting Committee lo duan chu an thlir ho a, siam that ngaite siam thain an pawm a. An pawm tâk chu mahni kohhran rorêlna sâng berah ngaihtuah tûra an thlen hnuah heng kohhran hrang hrangte hian CCM din chu an remti ta a ni.

CCM din chungchangah hian April 3, 2024 khân J.M. Lloyd Hall, MPC Synod Office, Aizawl-ah neih leh a ni a. Hetah hian chairman, secretary leh recording secretary-te bâkah MPC aiawh mi pasarih; BCM aiawh mi paruk; ECM aiawh mi paruk; LIKBK aiawh mi paruk; EFCI aiawh mi paruk; IKK Bualpui (Ng) aiawh mi panga an kalkhâwm a. Hetih lai hian a tir atanga hma latu zinga mi, Salvation Army erawh an tel remchang ta lo a ni.

Ruahman dan chuan CCM hruaitu (adhoc) tûrin President-ah Rev. R. Lalbiakliana (BCM), Vice President Rev. B. Zazawna Lai (LIKBK) leh Rev. Lalrodinpuia LS Nghaling (IKK Bualpui NG), General Secretary-ah Rev. Dr. Lalhmangaiha (MPC), Joint Secretary-ah Rev. T. Salaw (ECM), Treasurer-ah Upa R. Lalmalsawma (MPC) leh Finance Secretary-ah Rev. Jessai L. Neitham (EFCI) te an ruat a ni.

CCM din a nih chhan chu kohhran tinin thurin leh chin dan an neihte dah thaa mi mal, khawtlang leh sawrkar inrelbawlna tihhmasawnna kawnga thukhat vuaa tan ho tum a nih thu CCM hruaitute chuan an sawi a. Interim budget (thla ruk chhung) atan nuai 32 an thawhkhawm a, nimin rorel inkhawmah hian kum thara an budget tur hi an ruahman leh a. Budget hi kohhran member pakhat zelah Rs. 5 ni turin an rel a ni.

CCM-ah hian Mizoram chhunga kohhran pariat - Mizoram Presbyterian Kohhran, Mizoram Baptist Kohhran, Evengelical Church of Maraland, Lairam Isua Krista Baptist Kohhran, Evangelical Free Church of India, Isua Krista Kohhran, Independent Church of India leh Wesleyan Methodist Church of Mizoram te an tel mek a. Kohhran member 3,000 nei chin tan tel theih a ni.

CCM office thar hi naktuk zing dar 7:00 hian Synod Conference Centre-ah hawn a ni ang.