Mizoram a Covid -19 vei enkawl mek atanga 95.1% chu tualchhung (civil) mi an ni a, tun hnaiah sipai (force) lamah hri vei hmuh tlem mah se Bihar-a duty IR zingah hri vei hmuh thar an tam chho leh.

Chhianchhiah danin Mizoram chhunga sipai Covid-19 vei chu mi 911 tling tawhin enkawlna hmunah 25 an awm mek a. Sipaiho zingah hian NDRF, Indian Army leh CIJWS te zingah Covid-19 vei an awm rih lo a, Zirtawpni tlai dar 5 thleng khan sipai enkawl zat hi Mizorama Covid-19 vei za zela 4.99 (4.99%) niin an tla hniam leh a. Case 911 neih tawhah 886 chuan enkawlna hmun atangin an chhuak tawh a, mi 25 enkawl mek an ni. BSF enkawl lai 10, Assam Rifle enkawl lai enkawl 5 an ni leh tawh a, CRPF 4 enkawl an awm mek a. BRO leh BRTF mi 6 enkawl mek an ni bawk.

Civil mi Covid-19 vei 2,445 awm tawhin 1,940 chu enkawlna hmun atangin an chhuak tawh a, 476 enkawl lai an la awm a. Heti hian Covid-19 vei enkawl mek atanga 95.1% chu civil mi an ni. Lirthei khalhtu (Truckers) case 185 bak vei zui enkawl an awm rih lo a ni.

Health department chhinchhiah danin Mizoram chhungah Covid-19 vanga endik mi 1,94,926 awm tawhin sample test mi 1,37,933 an awm a. ZMC-a endik tawh mi 77,006 awmin, Truenat-PCR hmangin mi 8,966 leh Rapid Antigen Test hmanga endik mi 51,903 an awm tawh bawk a ni.

Mizoram Surveillance of COVID-19 in a tarlan danin Zirtawpni tlai dar 5 thleng khan Covid-19 positive natna lang chhuak dahna hmun DCH ah mi 48 dah mek a ni a, mi 2 dah luh thar an ni thung. Covid-19 positive natna lang chhuak lo enkawlna hmunah mi 427 enkawl mekin, mahni inlama in enkawl home isolation mi 18 an awm mek bawk a ni.

Zirtawpni thleng khan Covid-19 No Tolerance Fortnight hman mekah Aizawl district chhungah sawrkar dan siam bawhchhia mi 337 man niin, an pawisa chawi tlingkhawm chu Rs. 38,700/- a ni. Dan bawhchhia mante hi hmai tuamna vuah lo 334, vantlang hmuna chilchhak 1, social distancing vawng lo 1, containment area atanga chhuak ru pakhat an ni. Siaha-ah dan bawhchhia mi 16 man niin pawisa chawi tlingkhawm Rs. 1,600 a ni a, Siaha dist chhungah mi 1,044 man an ni tawh.

Serchhip-ah dan bawhchhia mi 24 man niin pawisa chawi tlingkhawm Rs. 2,400 a ni. Champhai-ah dan bawhchhia mi 8 man niin pawisa chawi tlingkhawm Rs. 800 a ni a. Lawngtlai-ah dan bawhchhia mi 26 man niin pawisa chawi tlingkhawm Rs. 4,400 leh Mamit-ah dan bawhchhia mi 28 man niin pawisa chawi tlingkhawm Rs. 2,800 a ni.