Mizo Zirlai Pawl chuan Mizo zirlai All India Service leh Central Service-a Mizo tlin tlem chhan awmte an zirchian hnuah New Delhi-a Coaching kal turin mi pathum an tir dawn.

New Delhi a Coaching tha bera tam takin an ngaih Vajiram & Ravi Coaching Centre N. Delhi-ah zirlai te hi an luh tir thei dawn a ni.

Vajiram & Ravi Coaching Centre N. Delhi hian MZP tan hian Seat 5 ngawt a dah sak a, mahse, hei hi an hnawhkhat zo dawn lo a, sum leh pai lamah harsatna a awm theih avangin mi pathum an tir dawn. MZP chuan he zirna in a lut tur hian an hlawhtling mai loh thu ZALEN an hrilh. MZP president Lalnunmawia Pautu chuan, "A tirah chuan kan dilna hi min hnawl sak a, mahse, kan thil tum te kan han hrilh hnuah min phur pui em em a, seast pangnga lai hi min  reserve sak ta a ni. Keini hian direct in kan be lo a,  New Delhi-a Addl. Resident Commissioner ni lai Alexander V Chongthu khu hma min laksak tur ber a ni," a ti.

MZP chuan mi inphalte thawhkhawm atangin Mizo zirlai pathum kan sponsor turte hi an senso engkim kan tumsak dawn a. Kum hnih chhung kalpui tura ruahman phawt a ni a, an pathum atana senso hi kum hnih atan hian cheng nuai 20 vel a ngai tih MZP president chuan a sawi. MZP president chuan donation khawn pawh a nawm thu ZALEN hrilhin, “ kan hotu hlui te pawhin min phurpui a, company lam pawh dawr an nuam, officer tam tak pawhin min phurpui a, dawr pawh an nuam,” tiin, “Tum danga donation khawn nen chuan a boruak a dang khawp mai,” a ti fiamthu bawk.

Vajiram & Ravi Coaching Centre, N. Delhi te hian zawhna te pawh an rawn set vek dawn a, UPSC Exam kalphung zulzuiin Screening Test kalpui a ni dawn a. Personal Interview uluk taka neih hnuah a titha pathumte thlan an ni ang. MPSC-in recruitment an kalpui ang thlap leh felfai thei ang bera kalpui tum a ni a.  Technical thilah chuan MPSC-te thurawn lak a nih angin, an facility an hmasak dawn bawk.

Dilna hi ni March 26, 2022 thleng hawn a ni ang a, April 2, 2022 hian Screening test neih a ni ang. Personal Interview chu April 8, 2022 -a nei tura ruahman a ni

Mizo zirlai tu pawh, Graduate tawhte tan dil theih a ni dawn a. Dilna hi Google Form hmanga kalpui tur a ni ang. Dilna link hi MZP website www.mzpmizoram.com leh Explore Mizoram website www.exploremizoram.com ah te dahchhuah a ni dawn a ni.