Natna hri tihbaiawm tak mai coronavirus chuan kum khat chhung khawvel a chamchilh ta reng mai. He natna hrik Covid-19 tia mi thiamten an koh hi China-a Hubei province khawpui, Wuhan atanga intan a ni a. Nikum December thla tawp lam khan Wuhan damdawi ina mi thiamte chuan awmna pui (pneumonia) ang deuh natna chi khat an hmu chhuak a, he natna hi Huanan Seafood Market atanga intan nia ngaih a ni. He thil thleng hi China thuneitu, National Health Commission (NHC) chuan World Health Organization an hriattir hnuah January 8, 2020 khan natna chi thar coronavirus a awm thu hi puan a ni ta a ni.

He natna hian khawvel puma tibuai a, ram hausa leh thiltitheiten an tuar nasa zual em ni tih mai turin thi pawh an tam a. Mizoramah pawh mi 7 thi tawhin ram ei leh barin nasa takin a tuar a. Kristiante hunpui leh nghahhlelh ber, Krismas pawhin a tuar hle. Kum tina Lal piang lawm nana ruai theh thin pawh kumin chuan theh theih a ni dawn lo va, hei hi Mizote Kristian kan nih hnua harsatna thleng lian ber a ni hial awm e.

Kum dangah chuan mahni khua ngeia Krismas hman tumin Mas dawnah mahni khua panin an liam sung sung thin a, kuminah erawh chuan mi eng emaw zat Aizawl atangin mahni khua pan mah se kum dang ngaihtuah chuan an tlem fal hle.

Maxi cab driver pakhat chuan kum dangah chuan tun ang hun hi passenger an neih tam hun lai leh an hlawk ve hun lai niin Zalen a hrilh a. “Kum dangah chuan Krismas dawn hi chuan kan kal lam leh haw lam hi passenger kan full thak thak zel a; mahse, kumin erawh chu Covid-19 avang hian veivak an tlem a. Kum dang kan phak lo nasa hle a, hripui hi kan tuar khawp mai,” tiin a sawi.

Aizawl khawpuia taxi khalh thin pakhat pawhin kum dang Krismas dawn nen chuan a inang lo hle tih a sawi bawk a. “Kum dangah chuan Krismas dawn khan zin chhuak tur leh haw tur lirthei a tam avangin Chanmari leh Treasury Square inkarte khan zing karah pawh a jam nghet thei hle a. Kuminah erawh chuan mihring leh lirthei an tlem hle a, keini pawhin tlanna tur kan nei tlem a, kan eizawnnain a tuar hle a ni,” tiin Zalen a hrilh bawk.

Covid-in ram sum leh pai dinhmun a tihchhiat avang leh economic-in a tawrh avangin kum danga home leh damdawi ina mi inphalten Krismas puala thilpek an pek thin pawh kum dang a phak lo hle niin an sawi bawk.