Khawvel pum tibuaitu natna chi khat Covid-19 chu kum khat chhung dawn lai mai kan buaipui ta a, a reh dawn emaw tih laiin ram thenkhatah chuan he natna hi insiam danglamin a hma aiin inkaichhawn a chak zawk thung. Mizoram pawhin he natna hi kan buaipui viau a, tunhnaiah erawh chanchin lawmaw nei chho zelin Covid 19 vei Mizoramah an tlahniam ta hle.

Mithiam te chuan December thla khan Mizorama Covid 19 vei chu mi 5000 tling tawh turah an ngai a, mahse kan tling lo a. Ni 01.01.2021 ah khan Central mithiamte chuan Mizoram ah Covid-19 positive 6437 awm turin an hrilhlawk a, mahse ni 1.1.2021 thlenga Covid 19 positive Mizoramin kan neih tawh zawng zawng 4216 an ni a. Central in min hrilhlawksak aia positive kan neih tlemna hi 2221 lai a ni.

Kumin chhunga test ah pawh January ni 3 leh January ni 14 na test ah te positive hmuh tur an awm lova. Vanduaithlak taka Saron venga hmuhchhuah tih loh chu a tlangpuiin state dang atanga lo kal te an ni a, hei bakah hian tualchhunga hri vei hmuh pawh an kaina chhui theih an ni tlangpui bawk.

Zalen in pa thil chikmi tak pakhat a kawm chuan state dangte ngaihtuah chuan Mizoramah sawrkar, kohhran leh tlawmngai pawl te an tanrual avangin leh mipui te thuawihna avangin Covid 19 vei an tlem chu lawmawm a tih thu a sawi a. "Covid 19 vei tihdam zat (recovery rate) hi tunhnai thla 2/1 chhung hian a sang hle a. A vei pawh hi kan pung lutuk lo niin a lang a, tun dinhmunah phei chuan a vei enkawl mek hi 100 hnuailam a ni chho ta deuh reng mai a, kan ziaawm chho hret hret niin a lang a, a lawmawm khawp mai," tiin a sawi.

Doctor pakhat chuan Mizoramah Covid 19 ziaawm chho deuhin lang mahse fimkhur a tul hle niin a sawi a. "Hri vei hmuhthar an tlem avang hian fimkhurna hi kan hlamchhiah mai ang tih a hlauhawm hle a, theihtawpa kan tan mar reng a ngai a ni," a ti a. Krismas dawn hnaia kan chhuak tam leh chhungkua/ thenrual tha chawi eikhawm kan uar thar leh chuan hri vei a tipung hluai ang tih a hlauh thu Zalen a hrilh bawk.