Mizoramah industry tenau a ding chho ta neuh neuh a, an thil siam te pawh Mizoram mai ni lo state pawnah hial an hralh chhuak tan mek. Hei mai ni lovin entrepreneurs te lo chhuak zelin chung te chuan an thil siam chhuah te mipui hriata phochhuah an duh thin a, chutianga pho chhuahna an neih theih chuan an thil siamte pawh hralh a kal phahin mipui hriat an lo hlawh thin a ni. Mahse tuna harsatna lian ber chu an thil siamte phochhuahna hmun tur hi a ni.

Tun hnai maiah North Eastern Council (NEC) bultumin Govt. Mizo High School field-ah Commerce & Industries department chuan Handloom & Handicraft Exhibition a buatsaih a, hetah hian hmarchhak state hrang hrang atangin puan leh thiamhnang hmanga thilsiam te pho chhuah a ni a, thil siamtuten an hlawkpui hle.

State dang atanga entrepreneurs lokal pakhat chuan sawrkarin an kal man, ei man leh riahna a tumsak bakah DA a pek avangin lawmawm a tih thu Zalen a hrilh a. Manipur atanga lokal stall nghaktu pakhat chuan exhibition neih chhungin an hralh tha hle tih a sawi a, hetiang hun hi sawrkarin tam zawk buatsaih se a duh tih a sawi.

Sikkim atanga lokal pakhat chuan an bungraw ken te chu exhibition tawp hmain an hralh zo vek tih a sawi bawk.

Exhibition-ah hian stall 60 siam a ni a, hmarchhak state 8-ten stall nei kim vekin Mizoram chuan a nei tam ber a, stall 14 an nei a ni. Zalen palaiin a kawmnaah Mizoram stall nghaktute chuan ni dang aiin exhibition neih chhungin an hralh tha zawk tih an sawi a, an thil pho chhuahte chu hralh a nuam hle niin an sawi bawk.

Exhibition tlawhtu pa pakhat chuan sawrkarin hetiang hun a buatsaih thin chu thil lawmawm tak ni mah se hetiang buatsaihna tur hmunhma nghet leh tha awm thei se a duh hle tih a sawi a. “Sawrkar a ni emaw, company leh mimal thahnemngaiten hetiang hun an buatsaih dawnin hmun hrang hrangah insuan kual a ngai thin a. A chang leh Assembly Annexe-ah te, Millennium Centre leh hmun remchang dangte zawn a ngai thin a. Hmun remchang tha chu awm thei se chuan tun aiin sum lakluh kawngah nasa takin Mizoramin hma a sawn ngei ka ring a ni,” a ti.