Mizote hian hun rei tawh tak atangin grape hi kan inbul leh chuktuah huanah te kan lo ching tawh thin a; mahse, ei zawnna atana hmang erawh kan awm lem lo. Mahi ei atan chuan ching thin mah ila hralh sum tak tak atan chuan kan ching lem lo a, Mizorama tih tak zeta grape ching leh ei zawnna atana hmang hmasatu chu Thanzama, Hnahlan khua hi a ni mai awm e.

Thanzama hian kum 1994 khan grape chin hi a tan a, a chi hi Champhai atanga a lak niin a sawi a. A grape chin chu kum 1996 velah a rah tan nia sawiin hemi kum hian quintal 2.5 vel an thar a, tihngaihna dang vak an hriat loh avangin mi dang belte hawh khawmin an um a; mahse, grape tui pawh chu hralh a kal lem lo niin a sawi.

Thanzama chuan kum 2000 vel thleng khan mahniin a ti chho bek bek a, a theih leh thiam ang angin grape tui chu a tiral a, kum 2002 atangin Hnahlan khua chuan grape chin chu tuipuiin society hial a ding ta niin a sawi. Thanzama chuan grape chuan Hnahlan leilung leh sik leh sa a ngeih tih sawiin, “Hnahlan tan chuan grape tluka thlai thar hlawk a awm lo va. Tin khat hmunah ringawt pawh tluan chuan chhungkaw chawm theihna a awm. Tuna kan grape chin hi mi thenkhat chuan Bangalore blue variety an ti a; mahse, keini chuan a inang lo deuhin kan hria a, Hnahlan variety kan vuah ve tawp mai a ni. Tuna kan grape chin hi Hnahlan tan chuan a tha ber a, mi dangin grape chi dang min pek hi a tha thei der lo,” tiin Zalen a hrilh.

Grape chin kawngah sawrkar inrawlhin tanpui thei se chuan kut hnathawktuten an hlawkpui lehzual dawn nia sawiin Thanzama chuan, “Sawrkar hian GI wire te, a ban tur leh thil dangte hi min tumsak thei se chuan tun ai hian kan hlawkpui lehzual ngei dawn a. A bultan hi a hautak avangin thingtlangpa tan chuan tlin a harsa a, sawrkar hi inrawlh thei se ka duh hle a ni,” tiin Zalen a hrilh bawk.

Hnahlan khua hi in 600 chuang an ni a, grape chin uar lai kha chuan chhungkaw tlem te tih loh chuan a khaw pumin grape an ching a. Grape an hralhna atang hian chhungkaw tam takin in leh lo an din bawk a ni.

Mizoram sawrkarin zu a phalrai lai khan grape hralh hi a kal lo deuh a; mahse, tun hnaiah erawh a market a ziaawm chho leh tawh a ni.