Mizoram khawchhak lama khaw thenkhat chuan grape chingin an hlawkpui hle a. Chutih laiin tunhnaiah grape atanga siamchhuah sawrkarin a man avangin inhnialna nasa tak a chhuak a. Grape chingtute leh sawngbawltute chuan awmdan tur hriatthiam har an ti hle.        

Hnahlan leh Champhai Grape Growers Society te chuan an hma hun zel atan sawrkar thuchhuak an nghak tawp tih sawiin tun dinhmunah chuan an duhdan te sawrkarah an thlen tawh avangin hmalakna an nei hrih lo tih ZALEN an hrilh a. Hnahlan Grape Growers Society hruaitute chuan, "Eptu hruaitute atangin no objection lehkha lain kan duhna te hi Chief Minister hnenah kan thlen tawh a, sawrkar hian ruahmanna tha tak a siam ngei kan beisei a, sawrkar thutlukna hi kan nghak tawp hrih a ni," an ti. 

Champhai Grape Growers Society hruaitute pawhin sawrkar hmalakna an nghak mek tih sawiin, "Wine rules hi Law department pawhin an enfel 'vetted' tawh niin kan hria a. Cabinet meeting in a pass ngei pawh kan ring a, chuvangin sawrkarah beiseina sang tak kan nei a ni," an ti. 

Hnahlan Grape Growers Society hruaitute chuan naktuk June ni 20,2022 atang hian kuthnathawktute grape tharchhuah chu lei tan leh an tum tih sawiin kumin ah hian quintal 1000 vel lei an tum niin an sawi a. Grape leina tur pawh hi pawisa an dah hrang tawh nia sawiin kuthnathawktute hian winery ah an thlaithar hi rawn kengin a hmunah pawisa pawh lo pek nghal zel an tum a ni.

Champhai Grape Growers Society hruaitute chuan grape tui dahkhawl an la ngah tih sawiin an siamchhuah 'Champwine' pawh an la ngah tih sawi bawkin mahse sawrkar lamin lo insum hrih tura a ngen avangin an hralhchhuak hrih lo niin an sawi.

Grape rah lei chungchangah Society hruaitute chuan, "Kumina grape thar hi lei ngei chu kan tum a, mahse June ni 27,2022 hian committee neih kan tum a, chutah chuan thutlukna chu kan siam chauh ang," tiin Baptist Church of Mizoram chuan an tharchhuah grape tui chu sacramental wine atan pek zel an tum niin an sawi bawk.