Mizoram mipuiten an damloh nikhuaa an sum sen te an hmuh let leh 
theihna turin sawrkar chuan Mizoram State Health Care Scheme a duang 
a, he scheme hnuaiah hian a tir lamah chuan natna thlanbik thenkhatah 
chauh damlo ten an senso an bill let thei a. Nikum lam atang khan natna 
zawng zawng deuh thaw-ah an senso hi an bill let thei a; mahse, an senso 
zawng zawng erawh an hmu let lem lo thung.

Mizoram State Health Care Society chuan nikum lam atang khan 
Mizoram State Health Care Scheme (MSHCS) leh Ayushman Bharat-
Pradhan Mantri Jan Arogya Yojana (AB-PMJAY) te a kalpui a. October 1, 
2019 atanga hman tan MSHCS hnuaia inziak lutte hian damdawiina an 
inenkawlna senso chhungkaw khatin kum khat atan ₹2,00,000/- thleng an 
bill thei a, inziah luh man (enrollment fee) hi kum khatah Rs. 1000 a ni. 
AB-PMJAY hi sawrkar laipui Ministry of Health & Family Welfare hnuaia 
scheme a ni a. Mizoramah chuan Mizoram State Health Care Society-in a 
kengkawh a. He scheme-ah hian chhungkaw pakhatin kum khatah 
₹5,00,000/- thleng damdawi ina inenkawlna senso bill theih tura ruahman a 
ni.

Mizoram sawrkarin tunlaia Health Care Scheme inziahluhna hun 
a hawn mekah mipuite chu an inziak lut tha thawkhat nia an hriat thu 
Mizoram State Health Care Society thawktute chuan ZALEN an hrilh a. 
Mizoramin financial year anga he scheme hi kalpui a tum avangin nakum 
March thla thleng atana hun khaihlak awm atan inziahluhna hun hi hawn 
leh a ni tih an sawi bawk a. “Inziah luhna hun hi kan hawn leh loh chuan 
September thla khan he scheme hi a zo tawh si a, damlo mi eng emaw 
zatten an bill theih dawn loh avangin thla ruk atan pawhsei a ni,” tiin mi 
thenkhatten an hrethiam lo chu pawi an tih hle tih an sawi bawk.

Sub Centre a thawk Health Worker pakhat chuan Health Care 
Scheme a inziahluh chu mipui ten ngai pawimawh se a duh tih Zalen a 
hrilh a. "Mi thenkhat he scheme hnuaia inziaklut si lo, an damloh nikhuaa 
buai tak tak an tam thin hle a. Inziahluhna hun a tawp tawh bawk si avangin 
kan tan tihngaihna a awm tawh si lova, a buaithlak thei khawp mai," a ti. Pa 
pakhat pawhin Health care inziahluh chu kumtin tih zel tha a tih thu Zalen a 
hrilh bawk a. "Mizoram sawrkarin he scheme a hman atang khan kumtin ka 
la in ziaklut ve zel a. He scheme hi chhawr tangkai lo thei ila ka duh ber a, 
mahse kan damloh palh thulhah chhawr tangkai a tul takin tiin ka in ziaklut 
zel a. Ka la chhawr tangkai lo hi ka lawm hle zawk a ni," a ti bawk.

Mizoram sawrkarin ruahmanna a siam dan chuan Mizoram State 
Health Care Scheme hnuaiah hian October ni 10,2021 atanga December 
ni 10,2021 thleng inziahluhna hun hawn a ni a. Thla 6 chhunga inziahluhna 
(enrollment fee) atan hian BPL chhungkua ah Rs. 50 leh APL chhungkua 
tan Rs. 500 a ngai a. He scheme hnuaia inziaklut te tan an damloh nikhua 
ah Rs. nuai khat thleng an bill let thei dawn a ni.