India ram hi inthlang ram, khawvela democracy ram lian ber kan ni a. Inthlanna atan electoral roll buatsaih niin heng roll hi a khât tawkin en that a ni thin a. Kum tling tawh, vote nei theite chu roll-ah thun thin an ni a, chutih laiin mitthi leh hmun danga pemte chu paih an ni thin. India ram state hrang hrangah chuan hmeichhia aiin mipa voter an tam thin a, Mizoramah erawh chuan hmeichhe voter an tam zawk tlat zel mai hian hnam dangte mak tih a hlawh hle thin.

Tun hnaiah pawh Mizoram electoral roll tihchhuah a ni a, Mizoram pumah voter 8,31,272 awmin heng zinga 4,27,345 chu hmeichhia niin mipa voter 4,03,927 an awm a. Mizoram pumah mipa aia hmeichhe voter an tamna hi 23,418 lai a tling a. Mizoram district 11 zingah Mamit leh Khawzawl district-ah chiah mipa an tam zawk a, heng district-ah pawh hian a inthlauhna a tlem hle.

Mizorama damdawi in lian ber leh mipui pawhin an pan tam ber, Civil Hospital, Aizawlah hian kum tin nau piang zingah hmeichhia aiin mipa an tam zawk zel a. Civil hospital-ah hian nikum khan nau piang 3,699 awmin heng zinga a tam zawk hi mipa an ni a. Civil Hospital, Aizawla nau piang atanga chhutin Mizoram pumah pawh mipa piang an tam zawk niin Economics & Statistics department chuan an chhinchhiah a; mahse, hetih laia hmeichhe voter an tam chhan hi mipa thi an tam vang a ni.

Directorate of Economics & Statistics-in Mizoram chhunga damdawi in hrang hrang (sawrkar, private, UPHC, CHC, PHC leh tualchhunga thi leh piang chhinchhiahtu ‘RBD’) 112-te report a lakkhawma doctor-ten damlote thih dan an chhinchhiahna ‘Medical Certification Causes of Death 2021’ tar lan danin nikum chhung khan damdawi in hrang hrangah mitthi 3,736 chhinchhiah a ni a, heng zinga 2,415 chu mipa niin hmeichhia 1,321 an awm bawk a. Heng thihna thleng zingah hian thin tha lo kaihhnawiha thi mi 578 awmin thihna tam ber nia chhinchhiah a ni.

Mizorama sumdawnna hmun hrang hrangah mipa aiin hmeichhia an tam zawk zel a. Sawrkar pisa hrang hrangah pawh police department tih lohah chuan hmeichhia an tam zawk nia thudawn a ni bawk.

Mi thil chik mite sawi dan chuan kuminah ringawt pawh pavalai thi an tam hle a, hengte hi ruihhlo kaihhnawih an ni tlangpui tih sawiin tun ang zela Mizoram hi a kal chuan hnam ral thei dinhmunah kan din mai a hlauhawm niin an sawi.